Qazaqstan Respýblıkasynyń Mońǵolııadaǵy elshisi Ǵabıt Qoıshybaev Mońǵolııanyń prezıdenti Ýhnagıın Húrelsúhqa senim gramotalaryn tabystady, dep habarlaıdy Egemen.kz.
Senim gramotalaryn tabystaý rásiminen keıin bolǵan suhbat barysynda taraptar qazaq-mońǵol qarym-qatynastarynyń jaǵdaıy men damý perspektıvalary týraly pikir almasyp, túrli deńgeılerdegi ekijaqty baılanystardyń kestesin talqylady.
Prezıdent Ý. Hýrelsýh Mońǵolııa men Qazaqstan óńirdegi jaı ǵana kórshi emes – olardy qazaq jáne mońǵol halyqtarynyń ortaq tarıhı tamyry, mádenı murasy men ómir salty biriktiredi, bul eki memleket arasyndaǵy dostyq pen yntymaqtastyqty odan ári nyǵaıtý úshin, sondaı-aq halyqaralyq alańdarda ózara qoldaý kórsetý úshin jaqsy negiz jáne alǵyshart ekenin atap ótti.
Taraptar ózara yntymaqtastyqtyń áleýeti áli de tolyq paıdalanylmaǵanymen kelisti. Osy oraıda saýda, kólik-logıstıka, taý-ken men óńdeý ónerkásibi, aýyl sharýashylyǵy men týrızm salalaryn qosa alǵanda, keń aýqymdaǵy ekijaqty yntymaqtastyqty ári qaraı damytý men tereńdetýdiń mańyzdylyǵy atap ótildi. Budan bólek taraptar eki memleketti baılanystyratyn erekshe «dostyq kópirine» aınalǵan Mońǵolııany mekendeıtin qazaqtardyń ekijaqty yntymaqtastyqty nyǵaıtýǵa qosatyn úlesi zor ekenin atap ótti.
Kezdesý barysynda Ǵ. Qoıshybaev 2022 jylǵy 5 maýsymda ótkizilgen Qazaqstan Respýblıkasynyń Konstıtýsııasyna ózgertýler men tolyqtyrýlar engizý jónindegi jalpyulttyq referendýmnyń negizgi qorytyndylary týraly aıtyp berdi. О́z kezeginde Ý. Húrelsúh Qazaqstan qoǵamynda oryn alyp otyrǵan demokratııalyq ózgeristerdi, onyń ishinde elimizde júrgizilip jatqan konstıtýsııalyq reformany qoldaıtynyn jetkizdi.
Jylylyq pen dostyq atmosferasynda ótken kezdesýdiń sońynda Mońǵolııa prezıdenti qazaqstandyq dıplomatqa eki el arasyndaǵy dostyq pen yntymaqtastyqty nyǵaıtý múddesi jolynda jemisti jumys tiledi.