Sırııa jónindegi Astana prosesiniń barlyq taraptary 2022 jylǵy 15-16 maýsymda Nur-Sultan qalasynda ótetin kelissózderge qatysatynyn rastady, dep habarlaıdy Egemen.kz SIM baspasóz qyzmetine silteme jasap.
Kelissózderge kepilger-memleketter – Reseı, Túrkııa jáne Iran, sondaı-aq Sırııa úkimeti men sırııalyq oppozısııa delegasııalary qatysady. Kezdesýge baqylaýshylar retinde BUU Bas hatshysynyń Sırııa jónindegi Arnaıy ókili keńsesiniń saıası máseleler jónindegi bas qyzmetkeri Robert Dann, Iordanııa delegasııasy, BUU Bosqyndar isteri jónindegi Joǵarǵy komıssary basqarmasynyń jáne Halyqaralyq Qyzyl Krest komıtetiniń ókilderi qatysady.
Sonymen qatar Reseı delegasııasy RF Prezıdentiniń Sırııa jónindegi arnaıy ókili Aleksandr Lavrentev, Túrkııa delegasııasy SIM Kópjaqty departamentiniń bas dırektory Seldjýk Ýnal, Iran delegasııasy SIM saıası máseleler jónindegi aǵa kómekshisi Alı Asgar Hadjı de qatysady.
Kelissózderdiń kún tártibine Sırııadaǵy jaǵdaı, onyń ishinde gýmanıtarlyq jáne áleýmettik-ekonomıkalyq ahýal, Jenevadaǵy sırııalyq konstıtýsııalyq komıtet jumysynyń jandaný perspektıvalary, taraptar arasyndaǵy senimdi nyǵaıtý, kepilge alynǵandardy bosatý jáne iz-tússiz joǵalǵandardy izdeý máseleleri enedi.
2022 jylǵy 15 maýsymda kepilger-elder sarapshylar deńgeıinde ekijaqty jáne úshjaqty konsýltasııalar ótkizýge nıetti, 16 maýsymda barlyq taraptardyń qatysýymen jalpy otyrys ótedi.