Munaıly óńir ákimi Serik Shápkenovtiń málimetinshe, Balalar jylyna oraı 70-ke jýyq is-sharany qamtıtyn arnaıy jospar jasaqtalǵan. Sol jospar aıasynda jyl basynan beri 40 is-shara ótip, nátıjesinde, 55 myńnan astam bala qamtylyp otyr.
– Balalar men jasóspirimderdiń sporttyq seksııalarǵa, shyǵarmashylyq úıirmelerge tegin barýy úshin jergilikti bıýdjetten 2 mlrd teńge bólindi. Sonyń nátıjesinde 3,5 myń bala qamtyldy. Endi buǵan qosymsha 2 myń jasóspirimdi qamtý josparlanyp otyr. Al jaz mezgilinde demalý jáne saýyqtyrý sharalarymen 130 myńnan astam balany qamtý kózdeldi. Qazir oblysta 1-10 synyptardaǵy oqýshylar sany – 134 500. Bul oqýshylardyń 97 paıyzyn quraıdy, – deıdi S.Shápkenov.
Ákimniń deregine súıensek, az qamtylǵan otbasylardaǵy jáne ata-anasynyń qamqorlyǵynsyz qalǵan balalardyń jazǵy demalysyn uıymdastyrý maqsatynda Atyraý qalasynyń mańynda úsh lager balalardy qabyldaı bastady. Reseı Federasııasynyń aýmaǵynda ornalasqan lagerge 1,5 myń bala jiberiledi. Az qamtylǵan otbasylardaǵy balalar úshin jazǵy demalysqa qosymsha demeýshilik kómek kórsetiledi. Al múmkindigi shekteýli, az qamtylǵan jáne kópbalaly otbasylardaǵy balalardyń, aýyldyq jerlerdegi oqýshylardyń olımpıadalyq rezerv mektepterinde, lıseıler men gımnazııalarda sapaly bilim alýyna qoldaý kórsetilip otyr. Osy maqsatta oblysta «Bir pán – bir oqýshy – bir nátıje» jobacy júzege asyrylyp jatyr. Joba nátıjesinde bıyl 46 oqýshyǵa joldama berilgen. О́tken aptada kópbalaly jáne turmysy tómen otbasylardyń 79 balasy «Qazaqstan geology» pansıonatyna attanyp ketti. Atalǵan pansıonat Reseıdegi Jeleznovodsk pen Pıatıgorsk qalalarynyń aralyǵyndaǵy Inozemsevo kentindegi Beshtaý baýraıynda ornalasqan. Pansıonat dırektorynyń mindetin atqarýshy Sholpan Esqalıevanyń aıtýyna qaraǵanda, lagerde atyraýlyq balalardyń demalysyn qyzyqty ótkizý úshin barlyq jaǵdaı jasalǵan. Demalys kezinde balalarǵa mádenı, sporttyq baǵdarlamalar, konkýrstar uıymdastyrylyp, túrli fılm kórsetý kózdelgen.
– Qyzyqty is-sharalarǵa qosa demalýshy balalar sol mańdaǵy qalalarǵa saıahattap, tarıhymen tanysady. Pansıonat aýmaǵynda voleıbol men basketbol, shaǵyn fýtbol, badmınton men úlken tennıske arnalǵan alańdar bar. Taza aýa jáne emdik mıneraldy sý balalardyń demalysty tıimdi ótkizýine, emdik prosedýralardy alyp, densaýlyǵyn jaqsartýyna yqpal etedi, – deıdi Sh.Esqalıeva.
Oblystyq bilim basqarmasy basshysynyń mindetin atqarýshy Aınagúl Dúısekenovanyń aıtýynsha, 26 mamyrda bastalǵan jazǵy mektepter 17 maýsymǵa deıin jumys isteıdi. Jazǵy mekteptiń óz ereksheligi bar. Bul – sabaqtyń ádettegi formatta ótpeıtini.
– Jazǵy mektepterge 1-8 jáne 10-synyp oqýshylaryn qabyldaý 26 maýsymda bastaldy. Sabaqty tek bilim oshaǵynda ǵana emes, mýzeılerde nemese taza aýada ótkizýge bolady. Ártúrli tanymdyq ekskýrsııalar uıymdastyrylyp otyr. Muǵalim ekskýrsııa kezinde eldiń tarıhy men geografııalyq ornalasýy týraly áńgimeleıdi. Jazǵy mekteptegi sabaq synyptaǵy oqýshylar sanyna qaramastan ótkizilip jatyr. Oqýshylarǵa úı tapsyrmasy berilmeıdi, – deıdi Aınagúl Dúısekenova.
Atyraý qalasy ákimdigi baspasóz qyzmetiniń málimetinshe, jazǵy demalysta orta mektep oqýshylary úshin qoǵamdyq kólikte tegin jol júrý týraly sheshim qabyldady. Buǵan qalalyq prokýratýra anyqtaǵan olqylyqtar sebep bolǵan.
– Mektep oqýshylary avtobýsqa mingende, ózimen birge kólik kartasyn alyp júrýi qajet. Tasymaldanǵan benefısıarlardyń sanyn naqtylaý úshin kartany valıdatorǵa tıgizý kerek. Bul kezde kartadan tólem úshin aqsha alynbaıdy. Osylaısha, Atyraýdaǵy balalar men jasóspirimder kólikti jyl boıy tegin paıdalanatyn bolady. Al stýdentter qoǵamdyq kólikte jeńildetilgen tarıfpen júredi. Olar úshin jol júrý quny 40 teńgeni quraıdy, – dep málim etti «Smart Atyraý» KMM dırektory Arslan Aronov.
Onyń aıtýynsha, mektep oqýshylary úshin sáýir aıynan beri jol júrý tolyǵymen tegin bolǵan. Osy aıǵa deıin kúnine alǵashqy eki sapar úshin oqýshylardyń kartasynan tólem jasalmaǵan. Oqýshylar budan keıingi saparǵa jol júrý aqysyn tólep kelgen. Alaıda mundaı talap Atyraý qalalyq máslıhatynyń sheshimine qaıshy ekeni anyqtalypty. Atyraý qalasynyń prokýrory Arshat Taıtýllınniń aıtýynsha, bul balalardy jalpy bilim beretin mektepterge tasymaldaý kezinde qaýipsizdikti qamtamasyz etýdiń saqtalýyna júrgizilgen taldaýda anyqtaldy.
– Prezıdent Qasym-Jomart Toqaev bıylǵy Balalar jylyna olardyń quqyqtaryna basa kóńil bólýdi tapsyrǵan edi. Osyǵan baılanysty balalar quqyǵynyń saqtalýyna taldaý júrgizý kezinde birneshe zań buzýshylyq anyqtaldy. Máselen, mektep avtobýsyn júrgizýshilerde kólik quraldaryn basqarý quqyǵynyń tıisti sanaty bolmaǵan. Kólik quraldaryna mindetti tehnıkalyq tekserý júrgizilmegen. Bul balalardyń ómiri men densaýlyǵyna qaýip tóndiredi, – deıdi A.Taıtýllın.
Taldaý nátıjesimen qalalyq tıisti oryndarǵa zań buzýshylyqty joıý týraly usynys engizildi. Prokýrordyń aktisine sáıkes, Atyraý qalasyndaǵy mektepterden 5 laýazymdy tulǵa tártiptik jaýapkershilikke tartylyp, 2 avtobýs júrgizýshisi jumystan shettetildi.
– Qazir anyqtalǵan zań buzýshylyqtar joıyldy. Mektep avtobýstarynyń júrgizýshilerine jáne kólik quraldaryna qoıylatyn talaptar zań talabyna sáıkestendirildi. Sáýir aıyna deıin Atyraý qalalyq máslıhatynyń 2015 jylǵy 27 naýryzdaǵy № 268 sheshiminiń talaptaryna qaramastan balalardan ekinshi sapardan keıin jolaqyny tóleý talap etilip kelgen. Prokýrordyń aktisimen balalardyń qoǵamdyq kólikte tegin jol júrý quqyǵy qamtamasyz etilip, kináliler tártiptik jaýapkershilikke tartyldy, – deıdi qala prokýrory A.Taıtýllın.
Atyraý oblysy