Aqparat jáne qoǵamdyq damý mınıstrligi qaıyrymdylyq salasynda qurmetti ataq berý erejeleriniń jobasyn daıyndady, dep habarlaıdy Egemen.kz.
Qurmetti ataq kelesi qaıyrymdylyq sýbektilerine beriledi:
Qaıyrymdylyq jasaýshylarǵa, qaıyrymdylyq uıymdaryna; Qaıyrymdylyq eriktilerine.Budan basqa, qaıyrymdylyq salasyn damytýǵa eleýli úles qosqan, fılantropııalyq, mesenattyq, demeýshilik qyzmetti, sondaı-aq kishi otanǵa kómek kórsetýdi júzege asyratyn azamattar men uıymdarǵa qurmetti ataq berý usynylady.
Qurmetti ataq berý Aqparat jáne qoǵamdyq damý mınıstriniń buıryǵymen qurylǵan komıssııa sheshiminiń negizinde júzege asyrylady.
Komıssııa múddeli memlekettik organdardyń, uıymdardyń ókilderinen, qoǵam qaıratkerlerinen, sarapshylar men Parlament depýtattarynan qurylady.
Qurmetti ataq berý týraly usynystarda úmitkerdiń jeke basyn, jumys tájirıbesin, qaıyrymdylyq salasyn damytýǵa qosqan áleýmettik úlesin, naqty sińirgen eńbegin sıpattaıtyn derekter kórsetiledi.
Qujat jobasy 30 maýsymǵa deıin jarııa talqylaý úshin Ashyq NQA saıtynda ornalastyrylǵan.