Memleket basshysy Qasym-Jomart Toqaev «Parıj kelisiminiń maqsattaryna jáne Qazaqstannyń kómirtekti beıtaraptyǵyna qol jetkizý joldary» atty halyqaralyq konferensııada «Kómirsýtekti beıtaraptyqqa jetýde orman alqaptaryn kóbeıtý mańyzdy ról oınaıdy. Qazaqstan orman alqaby az memleketke jatady. Orman qorynyń kólemi 30 mln gektardy nemese aýmaqtyń 11 paıyzyn quraıdy. Bıyl eldi jasyl jelektendirý boıynsha aýqymdy joba bastaldy. 2025 jylǵa deıin 2 mlrd aǵash otyrǵyzylady» degen bolatyn.
О́ńirde orman qorynyń molaıýyna aıryqsha mán berilip, kóshet otyrǵyzý jumystary muqııat qolǵa alynǵan. Ejelden samsaǵan aq qaıyń, máńgi jasyl qaraǵaıymen kórikti Kókshe óńirindegi orman-toǵaıdyń kólemin eseleı túsý keler urpaqtyń ıgiligine qaldyratyn baǵa jetpes mol mura ispetti. Kishi Túkti orman sharýashylyǵy zerli Zerendiniń kórkemdigi kemel, pushpaǵy qunarly óńirine ornalasqan. Orman sharýashylyǵynyń tuqymbaǵynda ózge óńirlerdi kógaldandyrýǵa asa qajetti kóshetter ósirilýde. Kúnge boı salyp kóterilip kele jatqan kóshetter 100 gektar jerge otyrǵyzylǵan.
It tumsyǵy ótpeıtin Kishi Túktiniń orman silemderi tumsa qalpynda. Atqan oqtaı túzýlikpen otyrǵyzylǵan balapan aǵashtardyń boı kóterip kele jatqanyn kórýdiń ózi bir qýanysh. Mańaıy aramshópten taza alqap ústinen uqypty qoldyń taby anyq baıqalady. Bir mezgilde otyrǵyzylǵandyqtan da bıiktigi birkelki.
– Biz baptap ósirgen kóshet alqabynyń myna tusy 50 gektarǵa taıaý, – deıdi ormanshy Sergeı Chernov, – mańdaı terimizdiń arqasynda jaqsy kóktep shyǵyp kele jatyr. Birligi myǵym ujymnyń biregeı eńbegi arqyly kóktem shyǵysymen qolaıly ýaqytty ótkizip almaı, júktelgen jumysty jaýapkershilikpen atqaryp shyqtyq.
Tuqymbaqta 15 adam turaqty jumyspen qamtylǵan. Orman daqyldary jónindegi ınjener Lıýdmıla Sanarovanyń aıtýyna qaraǵanda, aǵash tuqymyn jınaýdan bastap qaıta óńdeýge deıingi jumys orman sharýashylyǵy mamandarynyń kúshimen atqarylady. Kóshetke baılanysty qat-qabat sharýanyń barlyǵy ǵylymı negizben, kúndelikti tájirıbemen ushtastyrylǵan.
– Kógertip kóshet ósirý jan dúnıemizge óte jaqyn, – deıdi jumysshy Márııa Qabdýálıeva, – biz ósirgen kóshetterden qaýlap qalyń orman ósse, onyń ıgiligin adamdar kórse, bir ǵanıbet emes pe?
Oblysta 2025 jylǵa deıin 200 mln túp kóshet otyrǵyzý mejelenýde. Aýqymdy jumys dál osyndaı qarqynmen atqarylatyn bolsa, mindet údesinen shyǵýǵa múmkindik mol.
Aqmola oblysy,
Zerendi aýdany