Sabantoı – izgi tilek, aq nıettiń qundaǵyndaı

Buqpa taýynyń baýraıy túkti kilemdeı qulpyrady. Meıramǵa jınalǵan halyqtyń kóńili de tabıǵattyń osy bir tamasha shaǵy tárizdi búrlenip, alqyzyl gúlmen kómkergendeı. El kóńili kóterińki. Bir-birine toı qutty bolsyn aıtysyp, izgi tilekterin bildirýde. Kókshetaý qalasynyń qurmetti azamaty, eńbek ardageri, el aǵasy Rashıd Gaınýllın aqsaqaldyń aıtýyna qaraǵanda, sabantoı san ǵasyrdan beri jalǵasyp kele jatqan ulttyń ulaǵatty meıramy. Negizgi máni kóktemgi egisti tyńǵylyqty aıaqtaǵan soń, arqalarynan aýyr júk túskendeı, jaýapty maýsymdy eńsergen el bir jadyrap qalmaq. Qaharly qystan aman ótken, el yryzdyǵynyń negizi qalanǵan, jadyraǵan jazben qaýyshqan shaqta barsha jurttyń basy qosylyp, arqa-jarqa bolyp toı toılamaq. Jaı ǵana toı emes, beıbitshilik súıgish adamzat balasynyń eńbek merekesi ispetti. Erterekte aldynan jumys úrkip otyratyn eńbek ozattaryn qurmettep, keıingi urpaqqa úlgi retinde kórsetken. Dostyqtyń altyn arqaýyn bekitken. Qońsy qonǵan kórshiles aǵaıynmen tatý-tátti tirliktiń bederi beıneli berekeli shaǵyn baıandy etýdiń barysy qarastyrylǵan. Álbette, ulttyq ónerdiń órisi, jan jadyratar jyly shýaǵy umyt qalmaıdy. Sondaı-aq er jigittiń erligi synǵa túser sporttyq oıyndar da uıymdastyrylmaq.

Aldymen oblys ákiminiń orynbasary Eldos Ramazanov óńirde bir jaǵadan bas, bir jeńnen qol shyǵaryp, yntymaqpen kún keship jatqan júzdegen ult ókilderiniń ishinde ózge jurt tárizdi tatar men bashqurt halyqtarynyń da ulttyq bolmysy saqtalýyna qamqorlyq jasap jatqandyǵyn, eshteńeden kende emestigin aıtyp ótti.

– Tatar-bashqurt halyqtary taǵdyr­las, ulttyq salt-dástúri óte uqsas el, – de­di oblystyq tatar-bashqurt qoǵam­dyq birlestiginiń basshysy Rafaıl Sýl­karnaev. – Búgingi Kókshe­niń baý­raıyn­daǵy sabantoıǵa sonaý Qazannan Tatarstannyń eńbek sińirgen ártisi El­mıra Ahmatova men Tatarstannyń respýb­lıkalyq já­ne halyqaralyq baı­qaý­larynyń jeńim­pazy, belgili ánshi Ilnaz Garaev kelip kópshilik kóńilin kóterýde. Jergilikti «Ǵalııabaný» ansambli de óz ónerlerimen toı shyraıyn keltirýde. Biz qaı jerde júrsek te, qaı eldi meken etsek te ultymyzdyń ulyq qasıetin saqtaýǵa umtylamyz. Soǵan múm­kindik týǵyzyp, qamqorlyq jasap otyrǵan qazaq eline myń alǵys. Biz búgin­de bir atanyń balasy tárizdi bir-birimizge baýyr basyp, bite qaınasyp kettik.

Meıram barysynda meıman­darǵa tatar-bashqurt halqynyń dámi til úıiretin ulttyq asy usynylyp, balýandar beldesip, eptiler baǵana basyna shyǵyp, neshe túrli oıyn-saýyq ótkizdi.

– Kórshimiz tatar otbasy bolǵan soń biz de meıramdaryn kórip, tamashalaýǵa keldik, – deıdi Kókshetaý qalasynyń turǵyny Nurlan Alpysbaev. – Jalǵyz mereke kúnderi ǵana emes, ómirdiń barlyq sátinde de birgemiz ǵoı. Tili de túsinikti, tilegi de belgili. Siz, biz dep syılasyp kún keship kele jatyrmyz. Ulttyq merekeleriniń mánine qarasam, elge yryzdyq tilegen, jas urpaqqa tálim-tárbıe beretin tusy mol eken. Demek sabantoı qosyla soqqan ár júrekten óriletin izgi tilek pen aq nıettiń qundaǵy ispetti is-shara eken ǵoı.

Buqpa baýraıy merekelik kóńil kúımen alaýlap turdy. Taǵy­lymy mol toı ústinde ja­ras­qan bir­liktiń, jarasymdy tir­liktiń tyny­sy atoı salǵandaı. Júzderine kúl­ki úıirilgen aǵaıyn­nyń aq tilegi ýyzdaı ýyljyp, jan jadyratady.

Kókshetaý