QR Parlamenti Senatynyń depýtattary «Qazaqstan Respýblıkasynyń Ákimshilik quqyq buzýshylyq týraly Kodeksine ózgerister men tolyqtyrýlar engizý týraly» zań jobasyn eki oqylymda qoldady. Qujat Memleket basshysynyń qolyna jiberildi, dep habarlaıdy Egemen.kz.
Senator Erik Sultanov zań jobasynda qaryz shartynda belgilengen merzimde memlekettik Syrtqy qaryz qarajatyn ıgermegeni úshin ákimshilik jaýapkershilik engizý kózdelgenin habarlady.
«Bul jaýapkershilik bıýdjettik baǵdarlamanyń birinshi basshysyna júkteledi. Bul túzetýler bıýdjet zańnamasynyń jaýapkershiligin kúsheıtýge, sondaı-aq respýblıkalyq bıýdjetti tıimdi paıdalanýǵa baǵyttalǵan». ded QR Parlamenti Senatynyń depýtaty Erik Sultanov.
Senator Sultanbek Mákejanov túzetý qajettiligin dáleldeı otyryp, aýdıtorlyq is-sharalardy júrgizý barysynda jyl saıyn tıimsiz josparlaý men bıýdjet qarajatyn paıdalanbaýdyń kóptegen faktileri anyqtalatynyn habarlady.
«2019 jyly áleýmettik-ekonomıkalyq mindetterdi sheshýge bólingen bıýdjet qarajatyn tıimsiz josparlaý men paıdalaný somasy 1 trln 400 mlrd teńgeni, 2020 jyly - 1 trln 773 mlrd teńgeni, al 2021 jyly - 340 mlrd teńgeni qurady. Bul tómendeý 2021 jyly memlekettik aýdıtpen qamtylǵan qarajat kóleminiń jeti ese azaıýymen túsindiriledi. Tartylatyn syrtqy qaryzdardy paıdalanýdyń tıimdiligine qatysty máseleler de bar. Búgingi tańda úkimettiń syrtqy qaryzdarynyń jalpy somasy 21,4 mlrd dollardy quraıdy. Onyń ishinde 775 mln dollar somasyndaǵy qaryzdar joıyldy, 4,6 mlrd dollar somasyndaǵy 11 jobany iske asyrý merzimi uzartyldy», dedi Sultanbek Mákejanov.
Zań jobasynda sondaı-aq baılanys operatorlarynyń sapa standarttaryna, tehnıkalyq normalarǵa jáne baılanys qyzmetteri sapasynyń kórsetkishterine sáıkes kelmeıtin paıdalanýshylarǵa baılanys qyzmetterin kórsetkeni úshin jaýapkershiligin kúsheıtý kózdeledi.
Bul shara sandyq teńsizdikti joıýǵa, ǵalamtorǵa barynsha qol jetkizýdi jáne sapaly baılanysty qamtamasyz etýge kómektesedi.
Sondaı-aq, qujatta kólik quralyn memlekettik nómirsiz nemese jalǵan memlekettik nómir belgisimen basqarǵany úshin jaýapkershilik kúsheıtiledi.
Budan basqa, joǵary nemese joǵary oqý ornynan keıingi oqý oryndary quryltaıshylarynyń oqýdy jalǵastyrý úshin bilim alýshylardy aýystyrýdy qamtamasyz etpegeni jáne lısenzııadan aıyrylǵan nemese onyń qoldanylýy toqtatylǵan, sondaı-aq joǵary oqý orny taratylǵan jaǵdaıda olardyń jeke isterin basqa joǵary nemese joǵary oqý ornynan keıingi oqý oryndaryna bergeni úshin ákimshilik jaýaptylyǵy belgilenedi.
Bul shara, eń aldymen, bilim alýshylardyń quqyqtary men múddelerin qorǵaýǵa yqpal etedi.