Qazaqstanda 290 kásiporyn keramıkalyq kirpish óndiredi. Byltyr otandyq kásiporyndar ishki naryqtaǵy suranystyń 44 paıyzyn qamtamasyz etken.
Zamanaýı ómir aǵymy kópqabatty turǵyn úıler men ákimshilik ǵımarattar qurylysynda jańa baǵyttar men tıimdi ádis-tásilderdi qoldanýǵa jol ashýda. Osyǵan oraı búginde qurylys salý kezinde monolıtti beton keńinen paıdalanylýda. Bul tehnologııanyń basty artyqshylyǵy – ýaqytty únemdeıdi jáne shyǵyn az jumsalady.
Dese de sýyqqa tózimdiligi men dybys ótkizgishtigi turǵysynan kirpish qurylys jumystarynda áli de bolsyn úlken suranysqa ıe. Máselen, 2020 jyly turǵyn úı qurylysynyń 52 paıyzynda kirpish paıdalanylǵan. Monolıtti beton keńinen qoldanylatyn iri qalalardyń ózinde kirpishten salynǵan úılerdiń úles salmaǵy 40 paıyzdy quraıdy.
2021 jyly sılıkatty kirpish óndirý 2020 jylǵa qaraǵanda 7,2 paıyzǵa ósip, jalpy kólemi 1,2 mln tonnany qurady. Otandyq kásiporyndar atalǵan ónimge degen ishki suranysty 98-99 paıyzǵa qamtydy.
Al keramıkalyq kirpish óndirisi salasynda qalyptasqan jaǵdaı kóńil kónshiterlikteı emes. Búginde atalǵan ónimdi óndirý qýaty ishki naryqty tolyqqandy qamtı almaı otyr. Qazaqstanda keramıkalyq kirpish óndiretin 290 kásiporyn bar. Olardyń 2-i – iri, 7-i – orta jáne 281-i – shaǵyn óndiris oshaqtary. Atalǵan kásiporyndar ónim óndirý qýatyn 2020 jylǵa qaraǵanda 27 paıyzǵa arttyrǵanymen ishki naryqty qamtý úlesi bar bolǵany 44 paıyzdy qurady. Shyǵarylǵan ónim kólemi – 4,3 mln tekshe metr. Ishki naryqqa qajettiliktiń basym bóligi Reseı jáne О́zbekstannan jetkizilgen ımport esebinen qamtamasyz etilgen.
Osy rette aıta keteıik, Qazaqstanda keramıkalyq kirpish óndirýge qajetti shıkizattyń barlyq túri bar. Bul ónimdi óndirý úshin saz ben jabysqaq balshyq jáne qumnyń birneshe túri kerek.
Qabyrǵa materıaldaryna ımporttyq táýeldilikti azaıtý úshin 2025 jylǵa deıin Indýstrııalandyrý kartasyna keramıkalyq kirpish óndirý boıynsha 20 ınvestısııalyq joba engizildi. Onyń ishinde Almaty oblysynda D&J GROUP zaýytyn salý, Kókshetaý qalasyndaǵy ENKI kásipornynyń óndiristik qýatyn arttyrý sııaqty iri jobalar bar. Atalǵan jobalar otandyq óndiris kólemin arttyryp, ımporttyq táýeldilikti azaıtýǵa yqpal etpek.
Búginde qurylysta kirpishke balama retinde blok-modýldi tehnologııalar keńinen qoldanylýda. Munda ǵımarattyń arnaıy bólshekteri zaýyttar men qurylys alańdarynda jınaqtalady. Bul tehnologııa qurylys jumystaryn qoljetimdi, jyldam ári ekologııalyq turǵydan tıimdi ete túsedi.
2020 jyldan beri elordada ModeX Astana kólemdi-blokty úı qurylysy zaýytynyń alǵashqy kezegi tabysty jumys isteýde. Kásiporyndaǵy 10 qalyptaý mashınasy jylyna 7,5 myń kólemdi blok óndiredi. Bıylǵy jyly aýqymdy jobanyń ekinshi kezegin iske qosý josparlanyp otyr.
«Nurly jol» memlekettik baǵdarlamasy otandyq qurylys materıaldar óndirisin órkendetýge tyń serpin berdi. Atalǵan baǵdarlama aıasynda 2025 jylǵa deıin 100 mln sharshy metr turǵyn úı salynbaq. Bul úshin 5,6 mln dana sılıkatty jáne keramıkalyq kirpish pen 15,3 mln tekshe metr qabyrǵalyq bloktar qajettigi aıqyndaldy. Memlekettik baǵdarlama shartyna oraı, qurylys jumystarynda tek qana otandyq ónimder qoldanylýǵa tıis.
Otandyq óndirýshilerge jan-jaqty qoldaý kórsetý maqsatynda Indýstrııa jáne ınfraqurylymdyq damý mınıstrligi www.material.kz onlaın saýda sóresin iske qosty. Internet-resýrsta qurylys materıaldaryn óndiretin kásiporyndar men qurylys kompanııalary óz ónimderi men qyzmetterin jáne usynystaryn bildire alady. Bul alań qos tarapqa eshqandaı deldalsyz uzaqmerzimdi tıimdi kelisimshart jasasýǵa múmkindik berip, jańa bastamalarǵa jol ashady.