Búgin Ulybrıtanııanyń astanasy – Londonda tennısshilderdiń «Ýımbldon» týrnıri bastaldy. Bul jarysta Qazaqstannyń tórt ókili baq synaýda.
Áıelder arasyndaǵy jarysta eki oıynshymyz da óte myqty qarsylastarǵa tap boldy. Alǵashqy aınalymda elimizdiń birinshi raketkasy Elena Rybakına qytaılyq Chjan Shýaımen kezdesedi. Úzdikter tiziminde 41-orynda turǵan 33 jastaǵy Qytaıdyń ókili WTA týrnırlerin 15 ret utyp, osydan tórt jyl buryn dál osy dodanyń shırek fınalyna deıin jetken. Iýlııa Pýtınseva Alıze Kornemen sheberlik baıqasady. Álemdik reıtıngte 44-oryndy enshilegen 32 jastaǵy fransııalyq arý da kezinde biraz belesti baǵyndyrdy. Tarqatyp aıtsaq, WTA jarystarynda alty ret top jarǵan ol Aýstralııanyń ashyq birinshiliginiń shırek fınalynda óner kórsetti.
Erler arasyndaǵy týrnırde Aleksandr Býblık Marton Fýchovıchpen kúsh synasady. Majarstannyń myqtysy byltyr Ýımblonda úzdik segiz tennısshiniń qataryna qosyldy. Al Mıhaıl Kýkýshkın amerıkalyq Djenson Brýksbımen kezdesedi.