Apat aıtyp kelmeıdi. Almaty oblysyna qarasty Balqash aýdany Baqbaqty aýylynda qatty daýyl turyp, birneshe turǵyn úıge zalal keltirdi. Burqasyn boran myńǵa jýyq oqýshyny tárbıelep otyrǵan mekteptiń shatyryn julyp áketipti. Qazir apattan kelgen shyǵyndy tekserý jumystary júrgizilip jatyr.
Aıdyń kúnniń amanynda oryn alǵan tabıǵı qaýip-qaterden aýyl turǵyndary áli es jııar emes. Bári birlesip, daýyldan zardap shekken otbasylaryna hál-qaderinshe kómektesip jatyr.
«Tabıǵı apattyń qashan keletinin tap basyp aıtý qıyn. Aýyl mektebiniń shatyryn alaı-túleı jel stadıonǵa deıin súırep áketken. Odan bólek 2-3 turǵyn úıdiń tóbesiniń shıfry kósheni jaýyp qalǵan. Qýanyshqa oraı, zardap shekken eshkim joq. Qulaǵan aǵashtardan kósheni tazartyp jatyrmyn», deıdi aýyl ákimi Aıdarhan Myrzaqasym.
О́kinishke qaraı, zań aıasynda jekemenshik úılerge memleket tarapynan eshqandaı kómek kórsetilmeıdi. Ketken shyǵyndy úı ıeleri ózderi kóteredi. Aýdandyq tótenshe jaǵdaılar bóliminiń basshysy Ersin Jaǵyparov jaqynda arnaıy komıssııa qurylatynyn aıtty.
«Bolǵan oqıǵaǵa baılanysty aýdan ákimi arnaıy komıssııa quryp, kelgen shyǵyndy esepteıdi. Akt jasalyp, oblys ortalyǵyna jiberiledi. Áıtse de, turǵyn úılerge kómektesemiz dep aıta almaımyz. Ol másele zańda qarastyrylmaǵan. Tek aýyldyq bilim mekemesin qaıta qalpyna kelýine járdemdese alamyz», deıdi E.Jaǵyparov.