ASTANA. 28 sáýir. Búgin Qazaqstan Prezıdenti Nursultan Nazarbaev M.Lomonosov atyndaǵy Máskeý memlekettik ýnıversıtetinde eýrazııalyq ıntegrasııa taqyrybyndaǵy dárisinde Eýrazııalyq ekonomıkalyq odaqty 2050 jyly álemdegi ıntegrasııalyq uıymdardyń úzdik úshtigi quramynan tabylýǵa tıis ekenin aıtty. Bul týraly egemen.kz tilshisi habarlady.
Elbasynyń paıymynsha, qazirgi tańda álemde 300-den astam yqpaldastyq birlestikteri tirshilik etedi. Olardyń barlyǵy da belgili bir aýmaq pen sala boıynsha belgili bir dárejede kóshbasshy bolýǵa umtylady. Sondaı topjarǵan toptyń róli Eýrazııalyq ekonomıkalyq odaqqa da óte ońtaıly keledi.
«Eýrazııalyq ekonomıkalyq odaq aıasyndaǵy bizdiń áriptesterge 2050 jylǵa qaraı álemniń 300 birlestikteriniń ishinde eń myqty ıntegrasııalyq uıymdardyń úshtigine ený maqsatyn qoıýdy usynamyn. Qazirdiń ózinde men mundaı yqpaldastyqtyń tek úsh-tórteýin kórip otyrmyn. Bizge de nege talpynbasqa?» Reseı ekonomıkasynyń róli óte mańyzdy. Sondyqtan bizdiń birlestiktiń damýy ekonomıkalyq pragmatızm, jaýapkershilik, evolıýsııalyq, ashyqtyq sheńberinde júrgizilýi tıis», - dedi osy oraıdy Qazaqstan lıderi.
Sol oılardyń jalǵasy retinde N.Nazarbaev áriptesterine bul máselede Qazaqstannan úlgi alý kerektigin jetkizdi.
«Qazaqstanda 2050 jylǵa deıingi jańa strategııalyq baǵdarlama iske asyrylýda. Onyń aldynda bizde 2030 jylǵa deıingi baǵdarlama merziminen buryn júzege asqan bolatyn. Endi biz ózimizge ǵasyrdyń ortasynda álemniń damyǵan 30 eline ený jóninde maqsat qoıyp otyrmyz. Bul arman-qııal emes. Bul baǵdarlama tolyǵymen qarjymen, mamandarmen jáne jobalarmen qamtamasyz etiledi. Biz osy maqsatqa egemen, Eýrazııalyq ekonomıkalyq keńistiktiń tolyqqandy múshesi retinde qol jetkizýdi kózdep otyrmyz. Bizdiń barlyǵymyz osyndaı joǵary maqsattardy qoıýymyz kerek», - dedi budan soń Memleket basshysy.
Eske sala ketetin bir jaıt, Nursultan.Nazarbaevtyń Eýrazııalyq ekonomıkalyq odaq týraly ıdeıasy 1994 jyly M.V.Lomonosov atyndaǵy Máskeý memlekettik ýnıversıteti minbesinen aıtylǵan edi. Mine, arada 20 jyl ótkende, sol ıdeıanyń is júzine asyrylatyn sáti týyp, 2014 jyly mamyr aıynda Qazaqstan, Reseı jáne Belarýs memleketteriniń basshylary arasynda Eýrazııalyq ekonomıkalyq odaqty qurý týraly shartqa qol qoıylǵaly otyr.
Sáken Maılybaı.
Derekkóz: egemen.kz.
Foto: my-uni.ru.