«Jasyl damý» aksıonerlik qoǵamy Fransýzdyń Syctom kompanııasy men birlesip, Aqmola oblysynyń Aqkól aýdanynda organıkalyq (tamaq) qaldyqtardy shiritý ádisimen óńdeıtin jobany bıyl iske qosady.
Osy rette Syctom kompanııasy men «Jasyl damý» AQ jáne Aqkól aýdandyq ákimdigimen ózara túsinistik jóninde úshjaqty memorandýmǵa qol qoıyldy. Qyrkúıek aıynda fransýzdyq kompanııa organıkalyq qaldyqty shiritýge arnalǵan 5 birdeı elektrokomposter qurylǵysyn Aqkól aýdanyna jetkizýdi josparlap otyr. Jylyna 125 tonna organıkalyq (tamaq) qaldyq óńdeıtin zamanaýı qurylǵy Aqkól aýdanyndaǵy balalar úıine, ortalyq aýrýhanaǵa, ǵaryshtyq baılanys ortalyǵy keshenine jáne «Qamqor» áleýmettik qyzmet kórsetý ortalyǵy ǵımaratyna ornatylady.
Joba aıasynda fransýz tarapy qaldyqtardy qaıta óńdeýge qajetti jabdyqtar jetkizý men tehnıkalyq zertteýge ketetin shyǵyndardy óz moıyndaryna alǵan. Jergilikti ákimdik fransýz kompanııasy jetkizetin jabdyqty qabyldap, oǵan arnaıy jer bólip, fransýz kompanııasy men «Jasyl damý» AQ-qa óńdelgen qaldyq boıynsha monıtorıng esebin usynady.
Aqkól sapary aıasynda Syctom kompanııasynyń ókilderine arnaıy qurylǵy ornatylatyn nysandar tanystyryldy. Fransııalyq mamandar usynylǵan ǵımarattar organıkalyq qaldyqty kádege jaratýǵa qolaıly bolatynyn kórdi. Aıta ketý kerek, arnaıy qondyrǵyǵa salynatyn tamaq qaldyqtary qarashirikke aınalady. Ony baý-baqshaǵa tyńaıtqysh retinde qoldanýǵa bolady.
Esterińizge sala keteıik, tamaq qaldyqtaryn kádege jaratý boıynsha arnaıy qurylǵy ornatýdy qarjylandyrýǵa fransýz úkimeti 2020 jyly 500 myń eýro grant bólýge sheshim qabyldaǵan. Sonyń nátıjesinde, Qazaqstanda alǵash ret qolǵa alynyp otyrǵan joba FASEP (jeke sektorǵa kómek jáne zertteý qory) granty boıynsha Fransııa memleketi esebinen júzege asyrylýda.