Ulttyq testileý ortalyǵynyń dırektory Rýslan Emelbaev bıyl UBT erejelerin buzý 4 ese azaıǵanyn aıtty, dep habarlaıdy Egemen.kz.
«Testileý qorytyndysy boıynsha 103 myńnan astam talapker shekti ball jınady. Bul qatysýshylardyń jalpy sanynyń 67%-yn quraıdy. О́tken jylmen salystyrǵanda bul kórsetkish 7% joǵary. Testilenýshilerdiń 51 myńǵa jýyǵy (33%-y) shekti ball jınaı almady. UBT ortasha baly - 66. Bıyl eń joǵary ball – 139. 3179 oqýǵa túsýshi 120 baldan joǵary jınady», dedi ol ortalyq kommýnıkasııalar qyzmetinde ótken brıfıngide.
Sondaı-aq ol UBT-ǵa tyıym salynǵan zattardy kirgizý áreketteri men UBT erejelerin buzý sany birshama azaıǵanyn málim etti.
«Máselen, byltyr 756 túlek UBT-ǵa tyıym salynǵan zattardy alyp ótýge tyryssa, bıyl 327 jaǵdaı tirkeldi. Bul 2020 jyly ereje buzýǵa tyrysqan qatysýshylardy testileýge jibermeý týraly normanyń engizilýi men árbir testilenýshi úshin frontaldy kamera ornatýǵa baılanysty. Testileý kezinde ereje buzǵany úshin 322 adam aýdıtorııadan shyǵarylyp, nátıjesi joıyldy. Kórsetkish 4 ese tómendegen. Sebebi 2021 jyly aýdıtorııadan 1305 adam shyǵarylǵan bolatyn», dedi Rýslan Emelbaev.