Búgin «AMANAT» jastar qanatynyń kezekten tys VI Sezi ótti. Onda jastar qanatyn transformasııalaýdyń jańa baǵdarlamasy qabyldandy, dep habarlaıdy Egemen.kz.
VI kezekten tys Sezdiń sheshimimen jastar qanatyn transformasııalaýdyń jańa baǵdarlamasy qabyldandy, jastar uıymynyń ataýy ózgertildi. Ortalyq keńestiń quramy qoǵamdyq pikirdiń belsendi kóshbasshylaryn, ÚEU ókilderin jáne t.b. tartý esebinen keńeıtildi.
«Jastar Rýhy» ataýyn alǵan jastar qanatynyń tóraǵasy Nurjan Jetpisbaev elimizdegi saıası júıeniń transformasııasy «AMANAT» partııasynyń transformasııasynan bastalǵanyn aıtty.
«Partııany damytýdyń kelesi kezeńi - onyń jastar qanatyn jańǵyrtý. Biz jastar men bılik arasyndaǵy ózara is-qımyldyń tıimdi arnasyna aınalǵymyz keledi. Barlyq óńirden kelip túsken usynystar negizinde qaıta jandandyrý baǵdarlamasy ázirlendi. Sondaı-aq uıymnyń Ortalyq keńesiniń quramy qaıta qaraldy», dedi Nurjan Jetpisbaev.
Bul rette «AMANAT» partııasynyń Tóraǵasy jastar qanatynyń aldyna birqatar mindet qoıdy. Atap aıtqanda, jastar máseleleriniń aımaqtyq kartalaryn engizý, daryndy jastar úshin jobalar jármeńkesin jáne basqa da is-sharalardy ótkizý, jas kóshbasshylarǵa arnalǵan oqý baǵdarlamalarynyń tıimdiligin arttyrý, NEET sanatyndaǵy jastardyń problemalaryn sheshý jónindegi jumysty kúsheıtý, «Bir tolqynda» pikirtalas alańyn jáne JOO túlekterin jumysqa ornalastyrý boıynsha agenttik qurý.
Aıta ketsek, Memleket basshysy Qasym-Jomart Toqaev beınejazba arqyly «Jastar Rýhy» jastar qanatynyń kezekten tys VI Sezine qatysýshy delegattarǵa quttyqtaý sóz arnap, el jastaryna arnaıy úndeý joldaǵan edi.