Kúnniń altyn sáýlesine shomylǵan mamyrajaı tirliktiń sulbasy sulýdyń jan tolqytar sózindeı kóńilge nár beredi. Arý tabıǵattyń kóz sýyrar ásemdigi sýretshini aınalyp ótýi múmkin emes. Ymyrt uıalap, uzatylar qyzdyń sáýkelesindeı jelbiregen kúnniń shapaǵy Táńir jazǵan kartınadaı ǵajaıypqa toly. Taýdyń ıyǵyna súıenip baryp qalyń uıqyǵa batatyn tirshiliktiń tamyry sodan qýat alyp jatqandaı.
Qalaı desek te, kartınanyń baǵyt-baǵdary, keskin-kelbeti ózgeshe. Qazaq beıneleý óneriniń birtýar túlegi, shoqtyǵy bıik sýretshi Jańataı Shárdenovtyń qoltańbasy birden baıqalady. Tabıǵatqa kelgende taǵalaǵan jorǵadaı júıtkıtin sheberdiń eńbegi orasan. 1978 jyly jazylǵan «Kúnniń batý sımfonııasy» búginge deıin óz qunyn joǵaltqan joq.
Qylqalam sheberiniń ereksheligi de sol, tabıǵat kórinisterin beıneleı otyryp, boıaýdy qalyń ári birneshe qabatta qoldaný arqyly, taýdyń qyrlaryn, bólshekterin bir-birimen úılestirip, shynaıy beınesin tapqan. Tek taýlardyń ǵana emes, aǵash japyraqtaryn dál ornyqtyryp, gúlderdiń kúltelerine qonǵan kóleńkege deıin maǵyna bergen. Erkin jaǵý tásilimen olardyń faktýrasyn da naq taýypty. Sonyń áserinen beıneler keneptiń syrtynan jaryp shyǵyp, shynaıy túrde jandana, tirile túsedi. Bir sózben aıtqanda, qazirgi zamanaýı 3D formatta usynylyp turǵandaı áser qaldyrady.
Sýretkerdiń ár shyǵarmasy jeke bir álem. О́nertanýshylar da solaı dep paıymdaıdy. San alýan tústerdi qoldana otyryp, jyldyń ár mezgiline ózgeshe óń bergen. Tylsymǵa toly tabıǵattyń keremetin taý kórinisterimen áserli jetkizgen.
Baqsańyz, «Kúnniń batý sımfonııasy» shyǵarmasyndaǵy shyryndy jasyl, qyzǵylt, qara-kók, qońyr, ıaǵnı keshki ýaqytty beıneleıtin qanyq tústerdiń gammasy ret-retimen joǵarylaı jaǵylǵan. Tipti bir-birimen birlese otyryp, kýlmınasııa jasap, qorytyndy akkordtary qanyq qyzyl reńgke ulasady. Osylaısha saltanatty túrde shyǵarma támamdalady.