Qazaqstandyqtar eGov mobile mobıldik qosymshasynda otbasy týraly málimetterdi ózgerte alady. Bul jańa qyzmet túri týý, nekege turý jáne nekeni buzý, bala asyrap alý, áke bolýdy anyqtaý, aty-jónin ózgertý jáne qaıtys bolý týraly derekterdi aýystyrýǵa múmkindik beredi.
Azamattyq hal aktilerindegi mundaı málimetterdi ózgertý úshin tıisti mekemelerge barýdyń qajeti joq. Barlyq málimetti onlaın aýystyrýǵa bolady. Ol úshin telefonda eGov mobile mobıldik qosymshasy bolýy qajet. Al otbasy týraly jańa derekter AHAJ aqparattyq júıesine kelip túsýi úshin qujattardyń skanerlengen kóshirmelerin osy qosymshaǵa júktese jetkilikti. Mysaly, balanyń týý týraly aktilik jazbasynda bala týraly derekter (tegi, aty, ákesiniń aty, ulty, týǵan kúni, anasy men ákesi týraly derekter) durys engizilmegen delik. Ata-anasy málimetterdi óz betinshe túzete alady. Ol úshin durys málimet jazylǵan qujattyń skanerlengen kóshirmelerin júktep, málimetterdi jańartady.
Bul servıs eGov.kz portalynda da qoljetimdi. Osy qyzmet iske qosylǵan sátten bastap 83 myńnan astam adam óz derekterin ózgertken eken.
«Memlekettik qyzmetterdi alý kezinde keıde otbasy týraly málimetter durys engizilmeıdi. Jeke derekterden de qate ketip jatatynyn eshkim joqqa shyǵarmaıdy. Máselen, balanyń aty-jóninde qatelikter ketedi nemese kerisinshe derekti engizgen kezde basqa bala týraly aqparat paıda bolady. Buryn qate málimetterdi túzetý úshin qazaqstandyqtar tıisti mekemelerge baryp, ýaqytyn joǵaltatyn. Endi osy olqylyqtyń orny toldy. Jurtshylyq úıden shyqpaı-aq derekterdi jańarta alady. Ol úshin AHAJ aqparattyq júıesindegi derekterdi ózektendirý qajet. О́zgertýlerdi mekemege barmaı-aq eGov.kz arqyly engizýge bolady», deıdi «Ulttyq aqparattyq tehnologııalar» AQ basqarma tóraǵasy Rostıslav Konıashkın.
Bul fýnksııany paıdalaný úshin eGov mobile qosymshasyn ashý qajet. Ári qaraı qyzmetter mázirine kirip, ondaǵy «Týý, neke jáne ólim» qyzmetin tańdap, AHAJ AJ «málimetterdi ózektendirýdi» basý qajet. Sóıtip, akt jazbasynyń túrin tańdap, «izdeý» túımesi arqyly derekterdi tabý kerek. Eger derekter kórsetilmese, «málimetterdi ózektendirý» batyrmasyn qaıta basyp, (al eger derekter kórsetilse, «ózekti málimetter» batyrmasyn basý qajet), ári qaraı qyzmetke qol qoıý qajet.
Aıta keteıik, bul jańartýlar Memleket basshysynyń qujattardy sıfrlandyrý, neǵurlym bıýrokratııadan arylý jónindegi tapsyrmasyna sáıkes júzege asyrylyp otyr. Onyń negizgi máni – sıfrly transformasııa jáne memlekettik basqarýdyń barlyq salasyna júıeli reınjınırıng jasaý, deıdi mamandar.