Munaıly shahar turǵyndarynyń kóbirek serýendeıtin orny – Jaıyq ózeniniń jaǵalaýy. Oblystyq balalar kitaphanasynyń ujymy ózen jaǵalaýyndaǵy jastar saıabaǵyn oqyrman zalyna aınaldyrdy.
Kitaphanashylar atalǵan saıabaqtaǵy oryndyqtarǵa kórkem ádebıet týyndylary men balalarǵa arnalǵan ertegi kitaptaryn qoıdy. Maqsat – serýendeýshilerdiń nazaryn kitap oqýǵa aýdarý.
Saıabaqta kitap oqýǵa talpynǵan oqyrman qatary kóp boldy. Oqyrmandar úshin qazaq poezııasynyń kórnekti ókili, Qazaqstannyń Eńbek Eri Muhtar Shahanovtyń 80 jyldyǵyna oraı jyljymaly kitap kórmesi uıymdastyryldy. Aqynnyń ómiri men shyǵarmashylyǵyna qatysty vıktorınalyq suraqtar qoıyldy. Oqyrmandarǵa qazaq jáne orys tilindegi motıvasııalyq, psıhologııalyq, kórkem shyǵarmalar usynyldy. Kitaphanashylar men turǵyndardyń keıbiri gıtaramen án aıtyp, túrli mýzykalyq áýendi oryndady.
– Maǵan túrli-tústi kitaptar unaıdy. Bizdiń úıde ájem jınaǵan ertegiler toptamasy bar. Biraq sol kitaptar kórkem bezendirilmegen. Jaǵalaýdan sol ertegilerdiń jańa formatpen shyǵarylǵanyn kórdim. Endi balalar kitaphanasyna kitap oqýǵa baramyn. Kitaphananyń turaqty oqyrmany bolamyn, – deıdi 10 jasar Marına.
Jastar saıabaǵyndaǵy is-sharada belsendi oqyrmandarǵa arnaıy syılyqtar berildi.
Atyraý oblysy