Búgin Nur-Sultan qalasynyń ákimdiginde koronovırýstyq ınfeksııanyń taralýy men qazirgi jaǵdaıy boıynsha máseleler talqylandy, dep habarlaıdy Egemen.kz ákimdiktiń baspasóz qyzmetine silteme jasap.
Nur-Sultan qalasynyń Qoǵamdyq densaýlyq saqtaý basqarmasynyń basshysy Tımýr Muratovtyń aıtýynsha, qalada aǵymdaǵy jyldyń 22 maýsymynan bastap koronavırýstyq ınfeksııanyń ósýi baıqalady.
«145 adam ınfeksııalyq stasıonarlarda, tósek oryndarynyń júktelýi 36,8% quraıdy. Reanımasııa bólimshesinde 11 pasıent em alýda, onyń ishinde IVL apparatynda – 0, júktemeligi - 21,5%. Sońǵy 3 aptada ortasha eseppen táýligine 100 jaǵdaı tirkelip, 12 adam aýrýhanaǵa jatqyzylady. Búgingi kúnniń ózinde 353 adamnyń koronavırýs boıynsha PTR testi oń nátıje kórsetti. Barlyq sanıtarlyq normalardy saqtap, vaksına alyp, revaksınasııadan ótý kerek», dep atap ótti ol.
Is-shara Nur-Sultan qalasy ákiminiń orynbasary Erlan Bekmýrzaevtyń tóraǵalyǵymen ótti. Jıynǵa «Nur-Sultan qalasynyń sanıtarııalyq-epıdemıologııalyq baqylaý departamenti» RMM basshysy Sarhat Beısenova jáne qalalyq emhanalar men aýrýhanalardyń dırektorlary qatysty.
Aıta keteıik, qazirgi ýaqytta elordada 7 ınfeksııalyq stasıonar jumys isteıdi, olardyń tósek-oryn syıymdylyǵy - 394, onyń ishinde KVI emdeýge arnalǵan 51 reanımasııalyq tósek-oryn jabdyǵy bar.