Pavlodarlyq 33 jastaǵy Andreı Karandashovtyń qarmaǵyna balyq túspese de, halyqtyń nazary tústi. Ol ómirin qaterge tigip, aǵaıyndy úsh balany sýǵa batyp bara jatqan jerinen qutqaryp aldy! Kózsiz erlik ekeni sózsiz. Jurtshylyq áli kúnge deıin áleýmetttik jeliler arqyly «Jaraısyń, Andreı!», «Mine, naǵyz azamat!» dep ystyq yqylasyn bildirip jatyr.
Oqys oqıǵa 13 shilde kúni saǵat kúndizgi 3-ter shamasynda Aqtoǵaı aýdanyna qarasty Prırechensk aýylynda oryn aldy. Talaı aýyldyń berekesin arttyrǵan Ertis ózeni atalǵan aýyldy da basyp ótedi. Biraq eldi mekende jabdyqtalǵan jaǵajaı joq, jaǵalaý óte tik. Sondyqtan da jergilikti turǵyndar balalaryna sýǵa túsý bylaı tursyn, jaqyndaýǵa tyıym salady. Bes balanyń anasy Saltanat Shaıhova da úsh ulyna ózennen alystaý jerde serýendeýge ruqsat beredi. Osylaısha, toǵyz jasar Turar jáne jeti jastaǵy egizder – Aman men Esen alańsyz oınaýǵa kirisedi.
– Sol kúni jumystan kele sala uldaryma oınap kelýge ruqsat berdim. Meniń balalarym til alǵysh, ár nársege ruqsat suraıdy. Ádette, bul ýaqytta olar átkenshekke jáne kitaphanaǵa baratyn edi. О́zenge qalaı ketip qalǵandaryn túsinbeı dal boldym. Negizi balalar sýdan qorqady. Jarty saǵattan keıin kúıeýim qońyraý shalyp, uldardyń aýrýhanada ekenin aıtty. Ol balalardyń ózenge batyp kete jazdaǵanyn ári qalaı qutqarylǵany týraly ýchaskelik ınspektordan estigen, – deıdi Saltanat.
Belgili bolǵandaı, aǵaıyndylar Ertis ózenine jaqyn mańda turatyn dostaryna barǵan. Álgi bala «sýǵa sekirip oınaýdy» usynypty.
– Egizder sýǵa túspegen. Úlken ulym ǵana ózenge túsip, sý onyń tizesinen kelgen. Ulym sýda turyp sekire bastaıdy. Bir sátte ol sýǵa qulaıdy da ony aǵyn alyp ketedi. Muny kórgen egizder Turarǵa kómektesýge asyǵyp, sýǵa túsipti, – deıdi Saltanat.
Bul ýaqytta balalar oınap jatqan jerge jaqyn mańda «Aqtoǵaı-Agro» JShS qyzmetkeri Andreı Karandashov balyq aýlap otyrǵan. Qarmaǵyna balyq túspegen soń úıge qaıtýǵa jınala bastapty.
– Balalardyń jaqyn jerde júrgenin kórdim. Qarmaqtarymdy jınap jatyp, jaǵadan on metrdeı jerde balalardyń sýda jantalasyp jatqanyn ańǵardym. Aıqaıladym. Biraq olar ún qatpady. Ekinshi ret aıqaıladym, taǵy da únsizdik. Kenetten bireýi sýdyń astyna kete bastady. Men bul qaıǵyly jaǵdaı ekenin birden túsindim. Kıimderimdi sheshtim de birden sýǵa súńgidim. Ekeýin qutqaryp, úshinshisine kómekke barǵansha ol sýdyń astyna bata bastady. Onyń sońynan súńgip kettim de, ózen túbin qarmap júrip ony taýyp aldym. Jaǵaǵa alyp shyqtym. Men ár sekýndtyń qymbat ekenin túsindim. Balalardy qutqarý týraly oıladym jáne qolymnan kelgenniń bárin jasadym. Úshinshi balany jaǵaǵa shyǵaryp, alǵashqy medısınalyq kómek kórsetip, jasandy tynys aldyrdym. Ol sýdy kóp jutyp qoıdy. Júregine massaj jasadyq, eshteńe kómektespedi. Qatty tunshyǵyp qalǵandyqtan «aman qalmaıdy-aý» degen ókinish oı da boldy. Biraq oǵan sońyna deıin jasandy dem berip, jutqan sýyn shyǵarýǵa tyrystym. Qyrynan jatqyzyp, arqasynan qaǵa bastadym. Osy kezde balanyń ókpesinen sý shyǵyp, dem ala bastady. Men qýanyp kettim! Qýanyp tolqyǵanym sonshalyq, qoldarym dirildep ketti. Kóp uzamaı men shaqyrǵan jedel járdem men polısııa da keldi, – dep eske alady Andreı.
Jedel járdem qyzmetkerleri dereý balalardy aýrýhanaǵa jetkizdi. Qazir olardyń densaýlyǵyna qaýip tónip turǵan joq. Dárigerler bul uldardyń Andreıdiń der kezinde jáne saýatty áreketiniń arqasynda ǵana aman qalǵanyn aıtady.
Osylaısha, Andreı sııaqty erjúrek azamattyń arqasynda úsh taǵdyr aman qaldy. Qarmaǵyn jınap, úıine erte qaıtyp ketkende ne bolatynyn oılaýdyń ózi qıyn. «Perishtesi qaqty» deı me mundaıda?
Bul oqıǵadan keıin Aqtoǵaı aýdanynyń ákimi Qarshyǵa Arynov Prırechınsk aýylynyń turǵyndarymen jıyn ótkizip, Andreıdiń batyrlyǵyn tilge tıek etti. Oǵan teledıdar tartý etti. Andreı eńbek etetin «Aqtoǵaı-Agro» JShS basshylyǵy da shette qalǵan joq. Basshylyqtyń ókili: «Bizdiń ujymda jedel ári durys sheshim qabyldaı alatyn qyzmetkerlerdiń bolǵanyna óte qýanyshtymyz. Andreı – óz isin sheber atqaratyn mamannyń biri» deı kele, oǵan kásiporyn basshylyǵy atynan aqshalaı syıaqy tabystady. Qutqarylǵan balalardyń anasy Andreıge erligi men janqııarlyǵy úshin shyn júrekten alǵys aıtty.
Bul Andreı Karandashovtyń alǵashqy erligi emes eken. Ol nebári 13 jasynda kóz aldynda sýǵa batyp ketken segiz jasar balany qutqaryp qalǵan. Iá, beıbit zamanda da erliktiń bilekte emes, júrekte ekenin dáleldep júrgen azamattar az emes. Andreı Karandashov «Siz ózińizdi batyr sezinesiz be?» degen suraqqa kishipeıildilikpen: «Meniń ornymda bári de solaı isteıtin edi dep oılaımyn. Sebebi balalar meniń kóz aldymda jazym bolýy múmkin edi», dep jaýap qatty. Jaraısyń, Andreı!
Pavlodar oblysy,
Aqtoǵaı aýdany