Batys Qazaqstan oblysynyń Tasqala aýdany – elimizdiń soltústik-batys shekarasynda, toǵyz joldyń torabynda ornalasqan óndiristi óńir. Qazir munda aýyl sharýashylyǵy salasyn damytyp, ekinshi tynysyn ashý baǵytynda keshendi is-sharalar qolǵa alynǵan.
Tasqala aýdanynyń aýyl sharýashylyǵy salasyn damytý jáne «Jasyl beldeý» jobasyn iske asyrý aıasynda atqarylǵan jumystar týraly aýdan ákimi Baýyrjan Aıtmaǵambetov aıtyp berdi.
Jalpy, Tasqala aýdanynyń aýmaǵy 806 805 gektardy quraıdy. Aýdanda 16,5 myńdaı halyq turady. Turǵyndardyń ekonomıkalyq belsendi bóligi 9 531 adam bolsa, sonyń 10 paıyzy aýyl sharýashylyǵy salasynda eńbek etedi. Búginde aýdanda 459 agroqurylym tirkelgen. Onyń 403-i – sharýa qojalyǵy. Buǵan qosa 26 JShS, 1 AQ, 26 aýyl sharýashylyǵy óndiristik kooperatıvi bar.
– Jyl basynan aýdanda memleket menshigine qaıtarylǵan jáne aýdannyń bosalqy jerler quramynan sharýa qojalyqtaryna ýaqytsha óteýli jer paıdalaný quqyǵyn berý boıynsha 3 konkýrs ótkizildi. Sóıtip, jalpy kólemi 223 myń gektar quraıtyn 30 jer ýchaskesi sharýalarǵa berildi. Sonyń 4 myń gektary – egistik, 1,3 myń gektary – tyńaıǵan jer, 13,2 myń gektary – jaıylym, 4,8 myń gektary – shabyndyq. Dál qazir jalpy kólemi 500 gektar jaıylym jerden 1 jer ýchaskesiniń jobasy konkýrsqa daıyndalyp jatyr, – deıdi B.Aıtmaǵambetov.
Osy konkýrstar nátıjesinde aýdanǵa 2 mlrd teńge ınvestısııa kelip, jańadan 100-ge jýyq jumys orny ashylady dep kútilýde. Statıstıkalyq derekterge qaraǵanda, qazirdiń ózinde aýdan boıynsha egis alqabynyń kólemi ulǵaıyp keledi. Mysaly, 2022 jyly jalpy egis kólemi 42,7 myń gektar boldy. Bul 2021 jylmen salystyrǵanda 2,5%-ǵa kóp.
Bıyl óńirde jaýyn kóp, kóktiń kóterilýi jaqsy. Aýdan boıynsha 120,4 myń tonna shóp daıyndaý josparlanǵan. Qazirdiń ózinde shabyndyqqa shalǵy túsip, 30 myń tonna mal azyǵy daıyndalyp úlgergen.
Batys Qazaqstan oblysynyń ákimi Ǵalı Esqalıevtiń tapsyrmasymen bıyl óńirde «Jasyl beldeý» jobasy qolǵa alynǵan edi. Sonyń ishinde Tasqala aýdanynda 252 gektar baý-baqsha egilip, belgilengen jospar 12 gektarǵa artyq oryndalǵan. Sonyń ishinde 107 gektar kartop, 115 gektar kókónis, 30 gektar baqsha egildi.
Byltyr Batys Qazaqstan oblysynda «Meniń aýlam – meniń baǵym» jobasy jolǵa qoıylǵanyn jazǵan edik. 2021 jyly tasqalalyq 315 turǵyn osy jobaǵa qatysyp, 9 myńǵa jýyq jemis aǵashy egilgen. Bıyl kóktemde taǵy 6 172 terek egildi, sonyń ishinde 2 925 túp alma aǵashy, 150 túp órik, 3 235 túp tańqýraı, 3 305 túp basqa da jemis-jıdek bar. Oǵan qosa sáýir aıynda Oral qalasyndaǵy saıabaq kooperatıvterimen kelissóz júrgizý nátıjesinde aýdan ortalyǵynda jáne Shejin aýyldyq okrýginde jemis aǵashy kóshetterin satý jármeńkesi úsh márte uıymdastyryldy. Sóıtip, jalpy 937 túp jemis-jıdek kósheti satyldy. Baǵdarlama jospary bıylǵy kúzde tolyq oryndalady deıdi mamandar.
Baqsha egý salasynda kókeıkesti máseleniń biri – sýdy tıimdi paıdalaný jaıy. Osy maqsatta aýdanda sharýashylyqtar arasynda túsindirý jumysy únemi júrgizilip keledi. Qazir «Shevchenko», «Ishanǵalıev» jáne «Kıreev» sharýa qojalyqtary 15,5 gektar baý-baqshada tamshylatyp sýarý ádisin qoldanýda. Munyń bári ár tamshy sýdy únemdi paıdalaný úshin kerek-aq.
Baýyrjan Esqaıyruly Tasqala aýdanynda qolǵa alynǵan «Jasyl aımaq» baǵdarlamasynyń bolashaǵyna senedi. Bul baǵdarlama aıasynda 1 100 ga jerge aǵash kóshetin egý josparlanǵan. Bıyl kóktemde 1,6 ga jerge 5 500 túp aǵash kósheti egildi. Osy jumysty júıeli júrgizý maqsatynda bıyl aýdanda oblystyq orman sharýashylyǵy mekemesiniń fılıalyn qurý qolǵa alynbaq.
Batys Qazaqstan oblysy