Jaz bastalǵaly elimizde 394 orman órti jáne 22 dala órti tirkeldi. Bul týraly Tótenshe jaǵdaı mınıstrligi О́rtke qarsy qyzmet komıtetiniń tóraǵasy Nurbolat Derbisov aıtty, dep habarlaıdy Egemen.kz.
«Qabyldanyp jatqan sharalarǵa qaramastan, órt qaýpi kezeńi bastalǵaly 394 orman órti jáne 22 dala órti tirkeldi. О́rttiń jalpy aýdany 34 myń 785 gektarǵa jetti. Ásirese eldi mekenderdegi qurǵaq shóp órti erekshe alańdaýshylyq týǵyzady, onyń jalyny turǵyn úılerge jetýi múmkin», dedi N. Derbisov
Onyń aıtýynsha, 20 maýsym kúni Qaraǵandy oblysynda naızaǵaıdan dala órti tutanǵan. Oǵan ekpindi jel qosylyp, 45 gektardan astam jer órtengen jáne ony sóndirý kezinde bir adam jaralanyp, bir adam qaza tapty.
«Sondaı-aq 14 shilde kúni Atyraý oblysynda dala órti saldarynan júzdegen qoı qyryldy. Qazirgi ýaqytta naqty shyǵyn men ólgen maldyń sany anyqtalyp jatyr. Orman jáne dala órtiniń kópshiligi 100 shaqyrym radıýsta TJM bólimsheleri joq shalǵaı aýmaqtarda tutanady», dedi ol.