Prezıdent Qasym-Jomart Toqaev Mańǵystaý oblysyna arnaıy jumys saparymen kelgende óńirdiń áleýmettik-ekonomıkalyq damýy jónindegi jıynda ınflıasııa deńgeıiniń joǵary ekenin, munyń azyq-túlik taýarlary baǵasynyń tez ósýine áseri baryn aıtyp, Aqtaý qalasynda kommýnaldyq jáne kóterme bazarlardy salýdy tapsyrǵan bolatyn.
Memleket basshysynyń tapsyrmasynan keıin Aqtaý qalasynyń 36-shaǵyn aýdanynda joba qurylysy bastaldy. Qurylysty «ORS Aqtaý» JShS jeke ınvestordyń qarjysyna salýda, qazirgi tańda 2 myń sharshy metr aýmaqta pavılondar salynyp jatyr. Pavılondarda fermerler óz ónimderin deldalsyz jáne jalǵa alý tólemderinsiz sata alady, bul óz kezeginde tutynýshylar úshin baǵany qalyptastyrýǵa oń áser etpek.
– Kóterme-taratý ortalyǵynyń qurylysy joba boıynsha kezeń-kezeńimen iske asyrylyp jatyr. Qazir qurylystyń 30 paıyzy aıaqtaldy. Jobada jemis-jıdek, kókónis jáne qurǵaq tamaq ónimderin saqtaıtyn qoıma bolady, sonymen qatar mýltıkameraly tońazytqyshtar qarastyrylǵan. Jobanyń maqsaty – meıramhanalar, azyq-túlik dúkenderi, basqa da bıznes sýbektilerinde azyq-túlik qaýipsizdigin qamtamasyz etý jáne qala turǵyndaryn eshqandaı deldalsyz, naryqtaǵy baǵadan tómen azyq-túlikpen qamtý, deıdi «ORS Aqtaý» JShS dırektory Bekzat Jetkizgenov.
20 myń sharshy metr jerge ornalasatyn saýda jáne qoımany 500 adam jalǵa ala alady. 1,5 mlrd teńge jumsalatyn jobada bazar aýmaǵynda avtomobılderge jáne qalalyq qoǵamdyq kólikterge arnalǵan 750 oryndyq avtobeket jumys isteıtin bolady, sondaı-aq bir mezette 500 adam syıatyn jolaýshylar termınaly ornalaspaq.
Kóterme-taratý ortalyǵy 2023 jyly iske qosylady dep josparlanýda.
Mańǵystaý oblysy