Ertede úkideı úlbiregen, totydaı taranǵan qazaqtyń qyzdary barqyt, jibek sekildi qundy matalardan tigilgen taqııa kıgen. Ony oıýlap, áshekeı buıymdarmen kómkerip, jarasymdy etip qoıǵan. Taǵy bir dástúrdiń jańǵyrǵandyǵy bolar, sońǵy kezderi taqııa qaıta sánge aınaldy.
Qazaq arýy otbasylyq jaǵdaıyna qaraı jarasymdy taqııa, úkili sáýkele kıgen, turmys qurǵan soń aq oramal taqqan... Iá, qazaqta bas kıimniń túri kóp; zere, taqııa, tóbetaı, bergek, bórik, jaýlyq, jelek, jyrǵa, kımeshek dep kete beredi.
Jýyqta oblystyq A.Pýshkın atyndaǵy kitaphananyń Maker Space shyǵarmashylyq alańynda tiginshi Gýlfıra Baǵdaýletqyzy taqııa tigýden sheberlik saǵatyn ótkizdi. Qatysýshylar taqııanyń negizin qalaı qııýdy, ony tigýdi jáne áshekeılermen bezendirýdi úırendi. Bar bolǵany eki saǵattyń ishinde sándi, saltanatty taqııalar daıyn boldy. Uıymdastyrýshylardyń aıtýynsha, qyzyǵýshylar sany artsa, mundaı sheberlik saǵaty júıeli túrde ótip turmaq.
– Qazaqı oıý, asyl tastarmen bezendirilgen taqııalardyń suranysy kúnnen kúnge artyp keledi. Ulttyq qundylyqtyń qaıta jańaryp, jańǵyryp jatqanyna biz qýanamyz. Halyqqa taqııa tigýdi úıretip, dástúrimizdiń dáriptelýine osylaısha úles qosqymyz keledi, – deıdi Gýlfıra Izekova.
Taqııanyń sánge aınalýyna qaraı, túrli taqııa tigip, kásibin dóńgeletip otyrǵan tiginshiler de kóbeıdi. Alaıda A.Pýshkın kitaphanasynyń qabyrǵasynda árkim ózine jarasymdy taqııa tigip alýlaryna ábden bolady. Jalpy, bul kitaphanada oqyrman úshin atqarylyp jatqan sharýa ushan. О́tkende ǵana ekologııany polıetılen paketterden tazartý maqsatynda shúberek sómke tigip, tabıǵatty qorǵaýǵa úgittegen. Kitaphana basshylyǵynyń málimetinshe, aldaǵy ýaqytta áli de aýqymdy jobalar kóp. Onyń bári ret-retimen júzege asa bermek.
Shyǵys Qazaqstan oblysy