Qazaqstan úshin kún men jelden energııa óndirý basty basymdyqtyń birine aınalǵan. Jalpy, elimizdiń áleýeti búginde qoldanyp otyrǵan barlyq energııa mólsherinen áldeneshe ese kóp ekeni málim...
Jambyl oblysynda sońǵy jyldary kún, sý jáne jel elektr stansalary kóptep boı kótere bastady. Búginde Aıshabıbi aýyldyq okrýgine qarasty Qyzyltań eldi mekeniniń mańynda ornalasqan «Aısha Kúnshýaq» stansasynda 50 megavattyq elektr qýaty óndirilip jatyr.
Atalǵan nysannyń qurylys jumystary ótken jyly qolǵa alynǵan edi. Jaqynda ǵana paıdalanýǵa berilgen kún elektr stansasynyń qurylysyn ýkraınalyq «Rodına» JShS júrgizdi. 110 gektar aýmaqty alyp jatqan stansaǵa 100 myń kún paneli ornalastyrylǵan. Trekkerler júıesi arqyly panelder kún shyǵýyna qaraı qozǵalyp turady. Panelderdiń bir artyqshylyǵy, eki jaǵynan da jumys isteıdi. Máselen, qys mezgilinde jerge túsken qardyń kúnge shaǵylysqan sáýlesi arqyly da panel energııa qabyldaýǵa qaýqarly. Panelder Reseı Federasııasy men Qytaı eliniń ónimi sanalady.
Stansanyń basshysy Jandos Raıbekulynyń sózine súıensek, 50 megavatty quraıtyn kún elektr stansasyn salýǵa aýdan aýmaǵynan jalpy 300 gektar jer bólingen. Búginde onyń 110 gektaryna kún panelderi ornalastyrylǵan. Qazirgi kezde onda15 adam eńbek etip jatyr.
«Bizdiń stansanyń basqalardan artyqshylyǵy – qozǵalmalylyǵynda. Mundaǵy panelder kún sáýlesinen kóp energııa jınap qana qoımaı, kún kóziniń baǵytyna qaraı qozǵalyp, sáýleni kóbirek tartýǵa tyrysady. Uıytqyp soqqan qatty jelge de tótep bere alady. Aqpan aıynda bolǵan daýyl kezinde bul panelder óziniń tózimdiligin baıqatty. Sekýndyna 40-50 metr jyldamdyqpen soǵatyn daýylǵa tótep beretindeı etip eseptelgen», deıdi ol jaǵdaıdy túsindirip.
Derekke kóz júgirtsek, stansanyń qurylys jumysynyń jobalyq quny 20,8 mlrd teńgeni quraıdy. Kúnine 50 megavattyq elektr qýaty óndirilip, KEGOG-tyń birtutas energııa júıesine berilýde. Stansada óndirilgen qýat kózi 10 myńnan asa úı men óndiris oshaqtaryna jetedi. Nysannyń mańyn arnaıy jumysshylar talapqa saı tazalap otyrady. Ol úshin arnaıy shóp oratyn tehnıka da qarastyrylǵan.
«Kompanııa tarapynan úlken jumys atqaryldy. Bul – aýdannyń ǵana emes, oblystyń áleýmettik-ekonomıkalyq damýyna oń serpin beredi. Jalpy, elimizde tabıǵat kózderin tıimdi paıdalanýdy úırenip, kún, jel men sý kózderin ıgerý qajettiligi týyndap otyr. Qoldan kelip turǵanda elektr stansalaryn kóptep salyp, elimizdi elektr energııasyna degen táýeldilikten aryltyp, ózimizdiń otandyq ónim kólemin ulǵaıtýǵa tıispiz. Bul jumystar bolashaǵymyz úshin jasalyp jatyr», deıdi Jambyl aýdanynyń ákimi Erlan Qydyralyuly.
Jambyl oblysy,
Jambyl aýdany