Buǵan deıin Dımash Qudaıbergenniń mańdaıy jarqyrasa, byltyr Rýhııa Baıdúkenova jarq ete qalǵan «Slavıan bazary» halyqaralyq festıvalinen qazaq óneriniń qorjyny bıyl da quralaqan qaıtpady. Atap aıtqanda, 12 jasar Álınur Hamzın mýzykalyq «Slavıan bazary» halyqaralyq balalar baıqaýynda laýreat atanyp, II dárejeli dıplommen marapattaldy.
Sońǵy 5 jyl boıy respýblıkalyq, halyqaralyq án baıqaýlary men telejobalarǵa qatysyp júrgen Álınur «Slavıan bazarynyń» alǵashqy kúni Muqaǵalı Maqataevtyń sózine jazylǵan «Qazaǵym-aı» ánin shyrqady. Qazylar alqasy jerlesimizdiń ónerin joǵary baǵalady. Jarystyń ekinshi kúni jas ónerpaz Smokı Robınsonnyń Who's Lovin' You ánin oryndady. Osylaısha, jas ánshiniń juldyzy janyp, 138 upaı jınap, laýreat atandy.
Álınur Hamzın 2010 jyly Oral qalasynda dúnıege kelgen. Búginde qaladaǵy №27 jáne №1 mýzykalyq mektepterde bilim alyp jatyr. Parıjde ótken Junior Eurovision baıqaýy men Tashkentte ótken «Roza vostoka» atty halyqaralyq saıystarǵa qatysqan jerlesimizdi jeńisimen quttyqtap, shyǵarmashylyq tabys tileımiz.