Jumyspen qamtýdy úılestirý jáne áleýmettik baǵdarlamalar basqarmasynyń málimetinshe, «Qýatty óńirler – el damýynyń draıveri» ulttyq jobasy aıasynda jumys orny qat óńirlerde turyp jatqan 550 azamat Tobyl óńirine kóship kelmek. Sondaı-aq bıyl tarıhı Otanyna oralǵysy keletin 150 qandas astyqty óńirge turaqtap qalýdy nıet etip otyr.
Qonys aýdarýshylardyń eńbekke jaramdylary dáriger, medbıke, muǵalim, elektr mamany, aspaz, ken oryndaryndaǵy mashınıst kómekshisi, menedjer, ınjener, esepshi, slesar, elektr dánekerleýshisi, teatr ártisi sııaqty mamandyqtar boıynsha jumysqa ornalasatyn bolady.
– Eń basty mindet – ońtústik óńirlerden jáne shetelden qonys aýdarǵan adamdardy laıyqty jumyspen qamtý máselesin retteý. Arnaıy bilimi joq nemese mamandyǵy suranysqa saı emes azamattar kásibı daıarlyq kýrstarynan ótedi. Sondaı-aq bos nemese sýbsıdııalanǵan jumys oryndaryna ornalastyrý máselesi qarastyrylyp otyr. Onyń ústine, bizde «Urpaqtar kelisimsharty», «Kúmis jas» sekildi jańa jobalar bar. Máselen, óńirge ótken jyly kóship kelgen eńbekke qabiletti azamattardyń 96%-y jumyspen qamtyldy, – deıdi oblystyq jumyspen qamtýdy úılestirý jáne áleýmettik baǵdarlamalar basqarmasynyń orynbasary Aıda Qusaıynova.
Basqarma basshysy orynbasarynyń aıtýynsha, Tobyl-Torǵaı óńirine qonys aýdaratyn qandastardyń 98%-y О́zbekstannan kóship keledi eken. Al elimizdiń ózge óńirlerinen qonys aýdaratyndardyń ishinde Almaty, Mańǵystaý, Túrkistan oblystary men Shymkent, Astana qalalarynyń turǵyndary bar. Olardy jumys oryndarymen ǵana qamtyp qoımaı, baspana máselesiniń sheshilýinde de qoldaý kórsetý kózdelip otyr. Máselen, jańa qonys aýdarǵan otbasyndaǵy ár adamǵa 70 AEK mólsherinde sýbsıdııa beriledi. Sondaı-aq jańa kóship kelgen otbasylarǵa turǵyn úı jaldap turǵany úshin tólem jasalady. Tólem kólemi baspana jalyna tólenetin aılyq aqynyń qalalyq nemese aýyldyq eldi mekendegi mólsherine, sonymen qatar otbasyndaǵy jan basyna qaraı belgilenedi.
– Bul áleýmettik kómektiń mólsheri orta eseppen, aıyna 15-30 AEK shamasynda bolady. Bir sózben aıtqanda, óńirge kósh basyn burǵan aǵaıyn qoldaýsyz qalmaıdy. Barynsha kómek kórsetip, qushaq jaıa qarsy alamyz. Tobyl óńirinde bos jumys oryndary da jetkilikti. Sondyqtan qonys aýdarýshylardyń jumyssyz qalmaıtynyna senimdimiz, – deıdi A.Qusaıynova.
Jalpy, sońǵy bes jyl ishinde óńirge «Eńbek» baǵdarlamasy boıynsha bes myńǵa jýyq adam qonystanǵan. Onyń úsh myńnan astamy – elimizdiń jumys oryndary tapshy óńirlerinen kelgen eńbekke jaramdy azamattar. Munyń syrtynda, atajurtqa oralǵan 1 300 qandas bar.
Qostanaı oblysy