«Áleýmettik mańyzdy azyq-túlik ónimderiniń baǵasyna monıtorıng júrgizip, arnaıy jumys toptarynyń otyrystaryn ótkizý qymbatshylyqqa tusaý sala alǵan joq». Osylaı degen Abaı oblysynyń ákimi Nurlan Uranhaev baǵany yrqyna kóndirý úshin qosymsha kóterme-taratý ortalyqtaryn salý kerek ekenin aıtty.
Memleket basshysy taıaýda ótken Úkimettiń keńeıtilgen otyrysynda aıtqandaı, halyq ınflıasııa men azyq-túlik taýarlarynyń baǵasyn turaqtandyrýda, sondaı-aq azamattardyń tabysyn arttyrý men ekonomıkanyń naqty sektoryn qoldaý baǵytynda naqty, júıeli ári nátıjeli jumystardy kútedi.
Oblys ákimi Prezıdent júktegen tapsyrmalar strategııalyq sıpatqa ıe ekenin jáne syrtqy syn-qaterlerdi eskere kele, jańa kezeńdegi memlekettik damýdyń baǵytyn aıqyndaıtynyn jetkizdi.
«Sondyqtan is-qımylymyzdy úılestirip, qalyptasqan jaǵdaıdy jan-jaqty zerttep, Memleket basshysy aldymyzǵa qoıyp otyrǵan mindetterdi iske asyrý úshin naqty qabyldaıtyn sharalardy bekitýimiz qajet», dedi N.Uranhaev.
Onyń aıtýynsha, qajetti azyq-túlik ónimderiniń baǵasyn turaqtandyrýda qabyldanyp jatqan qazirgi amaldar nátıjesiz. Bul ásirese áleýmettik mańyzdy taýarlardyń baǵasyna monıtorıng júrgizý men jumys toptarynyń otyrysyna qatysty.
Qazir Semeıde baǵany ustap turý úshin 5,5 myń tonna kartop pen kókónisti saqtaýǵa arnalǵan Jolaman kóterme-taratý ortalyǵy jumys isteıdi. Bul rette ınvestorlardy tartý arqyly qosymsha kóterme-taratý ortalyqtaryn salý máselesi qarastyrylyp jatyr. Sol sekildi áleýmettik mańyzy bar ónimderdiń baǵasyn retteýge múmkindik beretin jeke turaqtandyrý qorymen qamtylǵan óńirlik áleýmettik-kásipkerlik korporasııasyn qurýǵa baılanysty jumys bastaldy.
«Bıylǵy qysqy maýsymda naryqtyq baǵalardyń ósýin tejep, kókónisterdi tómen baǵamen satý úshin biz Jolaman kóterme-taratý ortalyǵynyń qoryn kartop, qyryqqabat jáne sábiz syndy qajetti azyq-túlik ónimderimen tolyqtyramyz. Osy baǵytta jergilikti óndirýshilermen birlesip jumys isteýge daıynbyz.
Otandyq bıznes ulttyq ekonomıkany órkendetýge óz úlesin qosýǵa tıis. Sonymen qosa Semeıde halyqaralyq saýdany damytý qajet dep sanaımyz. Buǵan Reseı men Qytaıdyń óńirge irgeles ornalasýy oń yqpal ete alady. Biraq atalǵan baǵytta memlekettik qoldaý qajet bolady», dedi «Aqshyn» korporasııasynyń prezıdenti Marat Qurmanbaı.
Abaı oblysynda halyqty jumyspen qamtý máseleleri óte ózekti. Eki qolǵa bir kúrek tappaı júrgenderdiń tabysyn arttyrýdy kózdeıtin tetikterdiń biri 2025 jylǵa deıingi kásipkerlikti damytýdyń ulttyq jobasy sanalady.
Aıtalyq, osy jyly óńirde 13 477 jumys ornyn ashý kózdelip otyr. Jarma aýdanynda «Sement zaýytyn qalpyna keltirý jáne jańǵyrtý» jobasyn iske asyrý arqyly 1 085 adam jańa jumys ornymen qamtylady.
«Alda ekonomıkanyń barlyq salasynyń básekege qabilettiligi men onyń ınnovasııalyq quramdas bóliginiń sapasyn arttyrýǵa baılanysty aýqymdy jumys kútip tur. Tıimdi jumystyń kepili – barlyq memlekettik organnyń, qarjy jáne qoǵamdyq ınstıtýttardyń is-qımyldy úılestirip, birlese eńbek etýinde jatyr. Sondyqtan Prezıdenttiń tapsyrmalaryn iske asyrý úshin árkim óz ýchaskesinde belsendilik tanytyp, qajyrly jumys isteýge tıis», dedi N.Uranhaev.
Abaı oblysy