Memleket basshylarynyń basqosýy erkin formatta ótip, yntymaqtastyq pen birliktiń nyshany sezilip-aq turdy. El Prezıdenti Qasym-Jomart Toqaev aýqymdy máselelerdi kóterip, Ortalyq Azııa memleketteriniń basshylaryn túıtkilderdiń túıinin birlese tarqatýǵa shaqyrdy.
Atap aıtsaq, ózara taýar aınalymy júıesi, saýda-sattyqty arttyryp, halyqaralyq marshrýttardy tıimdi paıdalanýdy usyndy. Osy oraıda Qazaqstan tarapy Aqtaý portyn paıdalanýǵa, sonymen qatar Túrikmenstan men Iran arqyly Túrkııa naryǵyn baılanystyratyn eń qysqa jol «Qazaqstan – Túrikmenstan – Iran» temir jolyn belsendi paıdalanýǵa shaqyrdy. О́zara taýar aınalymyn arttyrý barysynda shekaradaǵy ótkizý beketterindegi ýaqytty qysqartý úshin jeńildikterdiń qarastyrylýy qajettigin jetkizdi.
Memleket basshysy óz sózinde Ortalyq Azııaǵa ınvestısııa tartý boıynsha jaqsy mysaldar keltirip ótti. Halyqaralyq sarapshylar aldaǵy 10 jylda bizdiń shetelden tikeleı ınvestısııa tartý jónindegi áleýetimizdi shamamen 170 mıllıard dollar, sonyń ishinde shıkizattyq emes sektorǵa shamamen 70 mıllıard dollar kóleminde bolady dep boljap otyr. Investısııa tartý boıynsha birlese jumys isteı otyryp, Ortalyq Azııa memleketteriniń damýyn ortaq sheshý joldary kórsetildi.
Jıynda kóterilgen eń ózekti túıtkildiń biri – muzdyqtardyń erýi men sý máselesi. Klımattyń ózgerýi jónindegi Halyqaralyq sarapshylar tobynyń baıandamasyna sáıkes bizdiń aımaqtyń temperatýrasy planetanyń basqa bólikterine qaraǵanda áldeqaıda jyldam jylyp keledi. Memleket basshysy kúsh-jigerimizdi jumyldyrmaı, Ortalyq Azııadaǵy klımattyń ózgerý saldaryn eńserý múmkin emes ekenin atap ótti. Sondyqtan birlesken is-qımyldardy úılestirý úshin Qorshaǵan ortany qorǵaý jáne aımaqtaǵy klımattyń ózgerýine qatysty kelisilgen saıasat júrgizý jónindegi Ortalyq Azııa elderiniń jobalyq keńsesin qurýdy usyndy.
Qoryta aıtsaq, bul sammıtte Ortalyq Azııa memleketteriniń damý jospary aıqyndala tústi. Endigi jerde ár máseleni birlese sheshý mańyzdy.
Baýyrjan SERIKBAEV,
saıasattanýshy