Atyraýlyq balalar arasynda kúrdeli operasııany qajet etetin syrqat kóp. Mundaı operasııalardy jergilikti jerde jasaý ońaı emes. Soǵan qaramastan, oblystyq balalar aýrýhanasynyń neırohırýrgtary kúrdeli otalardy qolǵa aldy. Máselen, byltyr tórt aılyq sábıdiń basyna, al jaqynda bir jasar balanyń mıyna jasalǵan kúrdeli ota sátti ótti.
Anasy tórt aılyq balasynyń bas pishinindegi dısproporsııany baıqaǵan. Dárigerler balada «bas súıeginiń týa bitken patologııasy», «sagıtaldy kranıostenoz» dıagnozy baryn anyqtaǵan. Balalar dárigerleriniń pikirine qaraǵanda, týa bitken patologııa kezinde bas dısproporsııasy óse bastaıdy. Sol sebepten balaǵa josparly hırýrgııalyq emdeý, sondaı-aq kranıotomııa usynylǵan. Otadan keıin dárigerler naýqastyń jasyna sáıkes bas pishininiń proporsııalaryn ornyna keltirdi.
Al elordadaǵy №2 kópbeıindi qalalyq balalar aýrýhanasy ortopedııa jáne ońaltý bólimshesiniń meńgerýshisi, medısına ǵylymdarynyń kandıdaty Aǵabek Chıkınaev tirek-qımyly buzylǵan atyraýlyq balalarǵa bes operasııa jasady. Joǵary sanatty ortoped-travmatolog Aǵabek Chıkınaevtyń aıtýyna qaraǵanda, ata-analar mundaı otany jasatý úshin balalaryn elordaǵa nemese shetelge aparýǵa májbúr.
– Meniń ulyma serebraldy sal aýrýy, gıdrosefalııa dıagnozy qoıylǵan. Ol júre alady. Biraq aıaǵyn syltyp basady. Atyraýǵa ortoped-dárigerdiń keletinin estip, oılanbastan ota jasatýǵa sheshim qabyldadyq. Bilikti dáriger jasaǵan ota sátti shyqty. Endi ulym esh qıyndyqsyz júretinine úmit artyp otyrmyn, – deıdi 14 jasar balanyń anasy Oktıabrına Qurmanǵazıeva.
Oblystyq densaýlyq saqtaý basqarmasynyń basshysy Ashan Baıdýálıevtiń aıtýynsha, byltyr «Ana men bala» ulttyq ǵylymı ortalyǵynyń 12 dárigeri shaqyrylǵan. Elordalyq dárigerler quramyndaǵy neonatolog, akýsher-gınekolog, kardıolog, nevrolog sekildi mamandar úsh kúnde 300-ge jýyq keńes berdi. Naýqas balalarǵa bes ota jasap, úmit otyn jandyrdy.
Jaqynda oblystyq balalar aýrýhanasynda bir jasar balanyń mıyna kúrdeli ota jasaldy. Balaqaı merziminen eki aı buryn dúnıege kelgen. Sol sebepten bastapqyda oblystyq perınataldyq ortalyqtyń jansaqtaý bóliminde dárigerler baqylaýynda bolǵan. Ortalyq dárigerleri balanyń densaýlyǵy jaqsarmaǵan soń balalar aýrýhanasynyń neırohırýrgi Shoder Arıpovke júgingen. Dárigerler balanyń mıyna qan quıylý dıagnozyn qoıǵan. Bul dıagnoz ýltradybystyq zertteý qorytyndysymen rastalǵan. Birneshe ret operasııa jasalǵan. Alaıda onyń mıynda alty isik ósip, almanyń kólemindeı deńgeıge jetken.
– Balalar arasyndaǵy mundaı syrqat elimizdiń ózge qalalarynda da kezdesip júr. Sol sebepten Atyraýǵa balalar neırohırýrgi Danııar Sabdınalıevti sheberlik sabaǵyn ótkizýge shaqyrdyq. Birneshe saǵatqa sozylǵan operasııa kezinde syrqat balanyń mıyndaǵy alty isikti alyp tastadyq. Qazir naýqas balanyń jaǵdaıy qanaǵattanarlyq deýge bolady. Bizdiń aýrýhanada osyndaı kúrdeli ota jasaldy, – deıdi neırohırýrg Shoder Arıpov.
Syrqat balalarǵa ómir syılap, olardyń ata-anasyn qýanyshqa keneltip júrgen neırohırýg Shoder Arıpov I.Ahýnbaev atyndaǵy Qyrǵyz memlekettik medısına akademııasyn bitirgen. Dárigerlik jolyn travmatologııada bastap, Qaraǵandy, Taraz qalalaryndaǵy aýrýhanalarda tájirıbe jınaǵan. Alaıda ony neırohırýrgııa qyzyqtyrǵan. Al tórt jyl buryn oblystyq densaýlyq saqtaý basqarmasynyń shaqyrýymen Atyraýǵa kóship kelgen.
Atyraý oblysy