Shymkent qalasy ákimdigi men «Qazaqstan halqyna» qoǵamdyq qory arasynda ekijaqty memorandýmǵa qol qoıyldy. Qor jyl sońyna deıin qalalyq perınataldyq ortalyqqa, №1 aýrýhanaǵa, qalalyq perzenthanaǵa jáne balalar klınıkalyq aýrýhanasyna oftolmologııalyq skrınıng júrgizetin medısınalyq apparattar satyp áperetin boldy.
Qor basshysynyń orynbasary Lázzat Shyńǵysbaevanyń aıtýynsha, osy kúnge deıin qazaqstandyqtardan 40 myń ótinish kelip túsipti. Onyń 30 paıyzy – halyqtyń jeke suranystary. Iаǵnı azamattar saıt arqyly habarlasyp, azyq-túlik sebetimen turaqty qamtamasyz etip turýdy, nesıesin jabýdy, baspana salyp berýdi surap ótinish qaldyrǵan. Qor basshysynyń orynbasary qoǵamdyq qaıyrymdylyq uıymy ondaı jeke ótinishtermen aınalyspaıtynyn jetkizdi. Elimizdiń basty qaıyrymdylyq qorynyń ókilimen kezdesýde Shymkenttiń úkimettik emes uıym ókilderi usynystaryn bildirip, birqatar baǵytta kómek surady. Mysaly, aýtızmmen aýyratyn balalardy ońaltý mekemesine materıaldyq kómek qajettigi aıtyldy. Qazirgi tańda Shymkentte myńnan astam bala aýtızmmen aýyrady. О́kinishke qaraı, olardyń sany jyldan-jylǵa ósip barady. Al qalada aýtızm sındromyna shaldyqqan balalarǵa ońaltý qyzmetin kórsetetin ortalyqtar suranystyń az ǵana bóligin qamtyp otyr. Qoǵamdyq birlestik ókilderiniń aıtýyna qaraǵanda, mundaı balalarmen aınalysatyn uıymdar qalada óte az, ekinshiden, ákimdik naqty eshqandaı is-áreket jasap jatqan joq. Bar aýyrtpalyqty ata-analardyń ózderi kóterýge májbúr. Sosyn 18 jastan asqan múgedektigi bar balalardy ońaltý mekemelerinen Shymkentte jekemenshik bireýi ǵana jumys istep tur. Múmkindigi shekteýli bala 18-ge tolǵan soń bar taǵdyry ózine tapsyrylady nemese áke-sheshesiniń ıyǵyna túsedi. Sondyqtan úkimettik emes uıym ókilderi osyndaı ortalyqtardyń kóbirek ashylýyna kómek qolyn sozsa degen tilegin jetkizdi. EKO – jasandy uryqtandyrýǵa qatysty da qordan kómek suraldy. Statıstıkaǵa súıensek, Shymkentte EKO qajet etetin 400 áıeldiń 30-yna ǵana balaly bolý buıyrypty. Sonda nebári 9-aq paıyz kelinshek kvota boıynsha jasandy jolmen bala kótergen.
Tamyz aıynda «Qazaqstan halqyna» qoǵamdyq qory men úkimettik emes uıymdar arasynda úlken jıyn ótedi. Qyrkúıek aıynda qorǵa baılanysty aýqymdy jıyn, ıaǵnı konferensııa uıymdastyrylmaq. Sonyń nátıjesine qaraı qaıyrymdylyq uıymnyń jańa jumys isteý erejesi men tujyrymdamasy bekitiledi. Konferensııanyń negizgi mindeti – ulttyq qaıyrymdylyqty damytý máseleleri boıynsha memleket, bıznes jáne ÚEU arasynda dıalog alańyn qurý, tájirıbe, aqparat jáne ıdeıalar almasý. Innovasııalyq ádisterdi zertteý jáne talqylaý, ashylmaǵan máselelerdi jáne progressıvti sheshimderdi izdeý, qaıyrymdylyq salasynda bolashaqqa ortaq mindetter qoıý da konferensııanyń basty taqyrybyna aınalmaq.
Ánýar JUMAShBAEV,
«Egemen Qazaqstan»
ShYMKENT