Shymkentte múgedektigi bar 18-den asqan jastardy ońaltatyn jalǵyz mekeme bar. Bul – Almagúl Kenjetaeva ashqan «Rahmet saǵan, Anashym!» múmkindigi shekteýli balalar analarynyń qoǵamdyq birlestigi.
– 18 jastan asqan múmkindigi shekteýli balalarǵa qyzmet kórsetetin uıymdy qınalyp júrip áreń ashtym. О́zimniń eki balam da múgedek. Sondyqtan olardyń janyn ana retinde menen artyq eshkim túsinbes dep oılaımyn. Búginde qalada 18-ge deıingi múmkindigi shekteýli balalardy ońaltatyn memlekettik, jekemenshik ortalyqtar jetkilikti. Al 18-den keıingi mundaı ortalyqtar múldem joq. Osy kúnge deıin qarastyrylmaǵan. Jaraıdy, kishkentaı kezinde memlekettiń qamqorlyǵynda bolsyn delik. Sonda bala 18-den keıin ne istemek? Meni osy oı qatty tolǵandyratyn?! – deıdi A.Kenjetaeva.
Jańa ortalyq ashýǵa kómek surap, tıisti mekemelerdiń tabaldyryǵyn 7 jyl boıy tozdyrǵan Almagúldiń jalǵyz úmiti – eresek balalardy ońaltatyn ortalyq ashýda memleket tarapynan qandaı da bir qoldaýǵa iligý edi. Alaıda túrli kedergi kese-kóldeneń shyǵa berip, isi nátıjesiz aıaqtalady. Sodan keıin ózine ǵana sený keregin túsinip, áreket jasaıdy. Kópqabatty úıdegi páterin satylymǵa qoıady. Bir jaǵynan shaǵyn ǵımaratty jalǵa alyp turady. Joly bolyp, satylymǵa qoıǵan páteriniń saýdasyna túsken aqshaǵa jer úı satyp alady. Keıin ony shaǵyn ǵana ońaltý ortalyǵyna laıyqtap ózgertedi. Almagúl byltyr 12 múgedek jandy tárbıesine alsa, bıyl 20 bala qamqorlyǵynda.
«Eshkimge kerek bolmaı qalǵan balalardyń tórt qabyrǵaǵa telmirip otyrǵanyn kórgim kelmeıdi. Júregim aýyrady. Qolarbaǵa telinip, ólmestiń kúnin keshken balalarǵa qarap, qalaı janyń ashymaıdy?! Qaı jerge kómek surap barsaq ta, aıtatyn sózderi bireý ǵana: bala 18-ge tolyp qoıǵan deıdi. Sonda 18-den asqan soń aıaǵynan turyp júrip ketetindeı. Qazir maǵan da ońaı soǵyp otyrǵan joq. Barlyq shyǵyndy óz qaltamnan óteýime týra keledi. Men saýapty is jasap jatyrmyn. Sondyqtan bul bastamama esh ókinbeımin. Endigi jerde meniń jobamdy demep jiberetin bir kómek bolsa», deıdi A.Kenjetaeva.
Qoǵamdyq birlestik tóraıymy óz úıiniń aýlasynda I jáne II top múgedektigi bar jastardy eńbekke baýlýmen aınalysady. Kópshiligi jumys isteýge degen qabiletiniń baryn kórsetýde. Al eńbekke múldem jaramaıtyndary aınalasynda dostary, tileýlesteri bar ekenin sezinip, psıhologııalyq qoldaý, demeý tabýda. Sol arqyly kún saıyn úılerine kóńil kúıleri kóterilip qaıtady. Sondaı-aq A.Kenjetaeva elimizde birinshi bolyp ınvatýrızm bastamasyn qolǵa alyp otyr. Sol bastamamen ata-analarmen birge balalardy kınoparkke qydyrtyp, túrli atraksıonda oınatyp, Birkólik shatqalynda demalyp qaıtqan.
«Endigi maqsatym – jergilikti ákimdik járdem berip jatsa, 100 oryndyq arnaıy ońaltý ortalyǵyn ashsam ba deımin. Jeke kásipkerlerge rahmet. О́tinishimizdi jerge tastamaı, qoldan kelgenshe kómek berip jatyr. 2017 jyly eki múgedek balammen respýblıkalyq telearnanyń baǵdarlamasyna qatysqan jaıym bar. Sol habardy elimizge belgili aıtysker-aqyn júrgizgen edi. Bizdiń halimizdiń qandaı ekenin kórip jany ashyp, jańa «Gazel» avtokóligin syılaǵan. Sol kólik búginde qajetimizge jarap tur. Jalpy, 18-ge deıingi múmkindigi shekteýli balalarǵa qamqorlyq elimizde qarastyrylǵan. Qanshama múgedektigi bar bala asyrap otyrǵan otbasylar memlekettik baǵdarlamamen úı alyp jatyr. Járdemaqy da tólenedi. Tipti balalardyń járdemaqysyna jan baǵyp otyrǵan otbasylar da bar. Endi kámelettik jastan asqan múgedektigi bar balalarǵa kóńil bóletin kez keldi. Osy janaıqaıymyzdy jergilikti bılik estise eken», deıdi qamqor ana.
Ras, qazir múmkindigi shekteýli bala baǵyp otyrǵan otbasylarda bir adam bala kútimine baılanǵan. Kúndiz-túni sonyń jaǵdaıyn jasaýmen ýaqytyn ótkizedi. Osyndaıda ata-analardyń sharshaıtyny belgili. О́ıtkeni olar da pende ǵoı. Al Almagúl Kenjetaeva ashqandaı, eresekterge arnalǵan ońaltý ortalyqtary ata-analardyń az da bolsa demalýyna, qoldarynyń bosaýyna múmkindik berer edi. Biraq ázirge bul másele bılik pen qoǵam tarapynan úlken qozǵalysty kútip otyr.
Ánýar JUMAShBAEV,
«Egemen Qazaqstan»
ShYMKENT