Ádilbek Baımuqanbetov esimi kúrshimdikterge jaqsy tanys. Qol kúresi men gir sportynan álem, Azııa, Qazaqstan chempıonattarynda top jarǵan sańlaqtardy baptaǵan Ádilbek О́mirbekuly qazir kemel shaǵynda.
Myna bir derekterge kóz salyńyzshy. Sport salasynda qyzmet etken 40 jylynda onnan astam jasty álem, osynshasyn Azııa chempıonattarynda júldeger etken bapker jaıly qalaı aıtsaq ta jarasady. Onyń syrtynda gir sportynan onnan astam sańlaqty el chempıony qataryna qosqan.
Jas kezinde Ádekeń erkin kúrespen shuǵyldanyp, sport sheberliginen úmitker atandy. О́z salmaǵynda el birinshiliginde san márte júlde terdi. Ermak qalasyndaǵy dene tárbıesi tehnıkýmynda oqyp júrgen kezinde Pavlodar oblysynyń namysyn qorǵady. Elge oralǵan soń aýdandaǵy kásiptik-tehnıkalyq ýchılıshege dene tárbıesiniń oqytýshysy bolyp ornalasty. Bul 1982 jyl bolatyn. Demek osydan 40 jyl buryn.
Aldymen az-kem gir sporty jaıly áńgime qozǵaıyq. Alǵash kelgen kezde gir sportyn mensinbegender kezdesti. 16, 24, 32 kılolyq gir tasyn eki qolymen alma-kezek kótergen kezde balalardyń qyzyǵýshylyǵy baıqaldy. Albyrt jastardyń birazy aýyr jattyǵýlarǵa shydaı almaı, úıirmeni tastap ta ketti. Al tabandy, qaısar jastar shydady. Ádilhan Nurǵazın degen shákirti oblystyq spartakıadanyń 11 dúrkin chempıony atandy. Ol-ol ma, álem chempıonatynda top jarǵan kezde eń birinshi bapkerin qushaqtap, alǵysyn aıtty. Amangeldi Qusaıynov degen shákirti gir sportynan aýdanda birinshi bolyp sport sheberi atandy. On shákirti gir sportynan sport sheberi bolyp, jerlesterin qýantty.
2007 jyly Nurjan Dúkıev degen shákirti qol kúresinen álem chempıony atanǵan kezde bapkeri erekshe qýanyshqa bólendi. Onyń sebebi bar. Nurjan tabandy, jattyǵý zalynan shyqpaıtyn, qaıtsem de álem chempıony atanamyn dep ustazyna sert bergen. Aqyry ýádesinde turdy. Zańǵar Áshimanov degen shákirti Reseıdiń Sýzdal qalasynda jalaýy jelbiregen jasóspirimder arasyndaǵy álem chempıonatynan jeńispen oraldy. Qazir Zańǵar Kúrshimdegi orta mektepte dene tárbıesinen sabaq berip, shákirtter tárbıelep júr. Urpaqtar sabaqtastyǵy degen osy bolsa kerek.
Kúrshimniń qyzdary da sport dese eleńdep turady. Osydan biraz jyl buryn Nazerke Malqaıdarova Ádilbektiń qol astynda qol kúresinen jattyǵa bastady. Erinbeıtin, jattyǵýlardan qalmaıtyn ójet qyz 2009 jyly Kanadada jalaýy jelbiregen álem chempıonatynan jeńispen oraldy. Terekti aýylyndaǵy bapker Baqythan Májıkovtiń shákirti Ernaz Nurahmetov aıdy aspanǵa bir-aq shyǵaryp, Tokıoda ótken álem chempıonatynan jeńispen oraldy.
– Iá, Kúrshim aýdanynda buqaralyq sport damyp keledi. Bizdegi 200-den astam sport ǵımaratynda: sport zaldary men eki stadıonda, basqa da sport alańdarynda qala turǵyndary – eresekter, jastar, mektep oqýshylary alańsyz jattyǵady. Barlyǵy tegin. Al Ádilbek sııaqty aǵamyzben maqtanamyz. 40 jylda qanshama álem chempıonyn tárbıelep shyǵardy. Aldaǵy ýaqytta da kúrshimdikter sportta bıik tabystarǵa jete beretini sózsiz, – deıdi aýdandyq mádenıet, tilderdi damytý, dene shynyqtyrý jáne sport bóliminiń basshysy Symbat Dúısenǵazın.
Zeınetker atansa da qatardan qalmaı, aýyl sportynyń órkendeýine erekshe úles qosyp kele jatqan Ádekeń sııaqty nar júgin arqalaǵan azamattarǵa alǵystan basqa aıtarymyz joq.
Ońdasyn ELÝBAI,
Qazaqstannyń qurmetti sport qaıratkeri
Shyǵys Qazaqstan oblysy,
Kúrshim aýdany