Adam kapıtalyn joǵary mádenıet, bilim men ǵylym, sonyń ishinde dástúrli din tárbıesiniń kómegimen damytý osy zamandyq turaqty ári órkenıetti álemge erkin qadam basýdyń birden-bir joly. Keshe Almatyda óz jumysyn bastaǵan «Dinı ekstremızm men terrorızmge qarsy is-áreketterindegi jastardyń róli» atty halyqaralyq forýmdaǵy keńinen pikir alysylǵan keleli áńgimege osy jaılar arqaý boldy. Qazaqstan úshin dástúrli dinder, memlekettik jáne qoǵamdyq uıymdar, ǵalymdar men jastar ókilderiniń osynaý kezdesýin Bas prokýratýranyń ınstıtýty, Din isteri jónindegi agenttik, «Jas Otan» jastar qanaty men ál-Farabı atyndaǵy Qazaq ulttyq ýnıversıteti Astanadaǵy EQYU Ortalyǵynyń qoldaýymen uıymdastyrǵanyn aıta ketý lázim.
Forým maqsaty ekstremızm men terrorızmge qarsy is-áreketter boıynsha jastar saıasatyn talqylap, jastar arasynda dinı radıkalızmniń ósýiniń sebepterin anyqtap, soǵan qarsy júıeli sharalar qoldaný joldaryn talqyǵa salý bolsa, jıyn barysy sol údeden kórindi. «Bizdiń jastarymyzdy ekstremızmnen qorǵaý joldaryn izdep otyrmyz. Bul qoǵam aldynda turǵan mindet. Jastarǵa óz oıymyzdy jetkizip, ulttyq qundylyqtarymyzdy tek dinı turǵydan emes, bilimdi, saýatty bola otyryp ta qorǵap qalýǵa bolatynyn aıtýdamyz. Búginde 4,5 mln. jas bar. Olardyń birazy neshe túrli aǵymdar jeteginde ketip jatyr. Memleket tarapynan «Dintaný negizderi» páni engizilip, oqý-quraldaryn jetildirý, oqytýshylardyń biliktiligin arttyrý oraıynda birtalaı jumystar jasalýda. О́tken jyly 1 700 myń adam qamtylǵan kezdesýler uıymdastyryldy. Áleýmettik zertteýler jastar arasynda ózderin dindar ataýshylar 2003 jyly 38,7 paıyz, al 2013 jyly 73,9 paıyz bolǵandyǵyn kórsetip otyr. Iаǵnı, on jyl ishinde ımandy jastar qatary eki ese kóbeıgen. Bul kóńilge qýanysh uıalatady» – dedi Din isteri agenttigi tóraǵasynyń orynbasary Ǵalym Shoıkın.
Osynaý mańyzdy sharaǵa arnaıy kelgen Qazaqstan musylmandary dinı basqarmasynyń tóraǵasy, Bas múftı Erjan qajy Malǵajyuly óz sózinde taqyryp búgin bastalǵan dúnıe emestigin, ýaǵyz-nasıhat jumystary buǵan deıin de júrgizilip kelgendigin aıtty. Biraq negizgi mindet áli de bolsa aǵymdar týraly tolyq aqparat berip, jastardyń qalypty damýyna durys jón silteý ekendigine baıypty túrde toqtaldy.
Qorǵanbek AMANJOL,
«Egemen Qazaqstan».
ALMATY.