Mádenıet jáne sport mınıstri Dáýren Abaev Soltústik Qazaqstan oblysynyń Imantaý-Shalqar kýrorttyq aımaǵynda jańa týrıstik maýsymnyń ashylýy aıasynda týrbıznes, ákimdik jáne ekologııa mınıstrligi ókilderimen kezdesý ótkizdi. Taraptar salany damytýǵa arnalǵan perspektıvalyq jobalardy iske asyrý máselelerin talqylady.
«Qazaqstannyń ár óńirinde bolashaqta ekologııalyq jáne tanymdyq týrızm ortalyqtary bola alatyn erekshe oryndar bar. Sonyń biri elimizdiń soltústiginde – «Kókshetaý» ulttyq parki aýmaǵynda ornalasqan Imantaý-Shalqar kýrortty aımaǵy, ol týrıstik aǵyndardyń 5 ese ósý áleýetine ıe, ıaǵnı jylyna 280 myń týrıske deıin qabyldaı alady», dep atap ótti mınıstr Dáýren Abaev.
О́z kezeginde týrbıznes ókilderi Shalqar kóliniń boıyndaǵy joldy jóndeýge jáne ınjenerlik ınfraqurylym qurylysyna ruqsat berýdi suraıdy. Kýrorttyq aımaq «Kókshetaý» ulttyq parkiniń aýmaǵynda ornalasqan jáne Ekologııa, geologııa jáne tabıǵı resýrstar mınıstrliginiń qaramaǵynda.
«Kól aýmaǵyn sapaly damytý úshin ákimdikpen birlesip týrıstik ınfraqurylymdy jabdyqtaýǵa múmkindik beretin normatıvtik quqyqtyq aktilerge ózgerister engizý qajet. Bul jumys bastalyp ta ketti», dedi EGTRM Orman sharýashylyǵy jáne janýarlar dúnıesi komıtetiniń tóraǵasy Nurlan Qylyshbaev.
Mınıstr D.Abaev sondaı-aq Shalqar jáne Imantaý kólderiniń boıyndaǵy týrıstik bazalardy aralap, ashyq aspan astyndaǵy murajaı qurylysynyń jobasymen tanysty, «Shalqar Sý» sanatorııiniń qalpyna keltirilý jumystarynyń barysyn kórdi.