ASTANA. 4 mamyr. Ortalyq kommýnıkasııalar qyzmetinde ótken brıfıngte Tutynýshylar quqyqtaryn qorǵaý agenttiginiń tóraǵasy Bolatbek Qýandyqov el turǵyndaryn tolǵandyryp júrgen birqatar máselelerge toqtaldy. Bul týraly Bnews.kz habarlady.
Brıfıngte Bolatbek Qýandyqov aldymen sibir jarasy týraly sóz qozǵady. О́z sózinde Agenttik tóraǵasy: «Qazaqstan aýmaǵynyń 40 paıyzy obanyń tabıǵı oshaǵy bolyp tabylatynyn esten shyǵarmaýymyz kerek. El aýmaǵynda 2 myńǵa jýyq sibir jarasy men basqa da asa qaýipti indetterdiń oshaǵy ornalasqan. Sondyqtan, bizdiń basty maqsatymyz – halyq arasynda juqpaly derttiń taralýynyń aldyn alý, jekelegen indetter uıasyn joıý», – dedi.
Budan keıin jurtshylyq kóbirek tutynatyn taǵamdardyń sanıtarlyq- gıgıenalyq máselelerin áńgime arqaýyna aınaldyrǵan ol: «Fast-fýd jóninde aıtyp óteıin... Bul jyldam daıyndalatyn taǵam túrleriniń biri. Keıingi ýaqytta halyq as ázirleýge ýaqyty bolmaǵandyqtan, kóshe boıynda satylatyn arzan ári dámdi fast-fýd ónimderine qumar bolyp aldy. Ony daıyndaıtyn mekemeler óz jumystaryn bastaıtyn ýaqytta ózgeler sııaqty sanıtarlyq-gıgıenalyq qorytyndy alýy tıis. Al olardyń daıyndaǵan ónimderine shaǵymdar túsip jatsa, jospardan tys tekserýler júrgiziledi. Sondyqtan, fast-fýd taǵamdaryna kúmándaryńyz bolsa, kez kelgen ýaqytta sol ónimdi bizge alyp kelýlerińizge bolady», – dedi.
Sondaı-aq, Bolatbek Qýandyqov tutynýshylardyń quqyn qorǵaý júıesin tolyǵymen jańǵyrtý kerektigine toqtala otyryp, zańdyq, quqyqtyq, tipti, normatıvtik aktilerdi qaıta qaraýdyń ýaqyty kelgenin, qoldanystaǵy qujattardyń basym bóligindegi talaptar osy zamanǵy ózgerister men tehnologııalyq úderisterge múldem saı emes ekenin jetkizdi.
Joldybaı Bazar.
Derekkóz: Bnews.kz.
Foto: med.kz.ucoz.com.