Atyraý munaı óńdeý zaýyty jumysyn toqtatty

Zaýyttyń qoǵammen baılanys bóliminiń málimetinshe, «KEGOC» AQ elektr qýatyn jospardan tys toqtatyp tastaǵan. Sonyń saldarynan Atyraý munaı óńdeý zaýytynyń jumysyn avarııalyq jaǵdaıda toqtatýǵa májbúr bolǵan. Tótenshe jaǵdaıdyń al­dyn alý úshin syrtqy elektr­men jabdyqtaý júıesi tolyq turaq­tan­ǵansha, zaýyttyń otyn jelisi teh­nologııalyq reglamentke sáı­kes alaý júıesine baǵyttalǵan.

Atyraý munaı óńdeý zaýy­ty­nyń bas dırektory Murat Dosmuratovtyń málimetinshe, elektr energııasynyń óshýinen bastapqyda eki qondyrǵynyń jumysy, keıin zaýyttyń óndirisi tolyq toqtap qalǵan. Munaıdy bastapqy kezeńde aıdaıtyn tek eki qondyrǵynyń jumysyn saq­tap qalýǵa múmkindik tý­ǵan. Qondyrǵylardy isten shyǵarý kezinde barlyq gaz alaý sha­rýa­shylyǵyna jiberilgen. Bul – qon­dyrǵylarda depressııa bolmaýy úshin avtomatty túrde jasalatyn úderis. Zaýyt qondyrǵylaryna kelgen zııan týraly aıtýǵa áli erterek. О́ıtkeni bul qondyrǵylardy iske qosý kezinde anyqtalady.

– Qazir bizdiń zaýyttyń qorynda 26 myń tonna benzın, 22 myń tonna dızel otyny, 4 myń tonna kerosın bar. Ben­zın men dızel otyny tuty­ný­shylarǵa 5-6 kúnde, kerosın bir aptada jóneltiledi. Al zaýyttyń qondyrǵylaryn synaq­tan ótkizýdi, iske qosýdy bas­taý úshin elektr qýatyn berýdi qalpyna keltirý qajet. Bul – qysqa merzim ishinde ekinshi ret qaıtalanǵan apattyq óshirý. Biz ótken jumada elektr energııasyna baılanysty eki qondyrǵynyń jumysyn toqtatqan edik. Sol qondyrǵylardy iske qosýǵa bir jarym kún ketti. Qazirgi ahýal múldem basqasha bolyp otyr. Endi qondyrǵylardy munaı ónimderinen, katalızatordan tazartý qajet. Sondyqtan barlyq qondyrǵynyń jumysyn qalpyna keltirýge qansha kún ketetinin boljaý múmkin emes, – deıdi M.Dos­muratov.

Energetıka mınıstrliginiń máli­me­tinshe, Atyraý oblysyn­daǵy aýa raıynyń qolaısyz­dy­ǵynan «Qurmanǵazy» munaı aıdaý stansasyna energııa jetkizetin baǵanadaǵy 220 kV-tyq eki elektr jelisi bir mezgilde óship qalǵan. Elektr jelisi «KTK» AQ-nyń teńgerimine alynǵan. Elektr berý jelileriniń baǵanalary qulaǵan. Osyǵan baılanysty «KTK» AQ-nyń Qazaqstandaǵy jelisin energııamen qamtý 16 MVt-ǵa deıin shektelip otyr. Al Atyraý munaı óńdeý zaýytynda qorektendirýshi jelilerdiń iske qosý tetikteri, «Karabatan Utility Solution» elektr stansasynyń energııa júıesimen baılanys jelileri óshken. Osynyń saldarynan elektr stansasy generasııa­ny nólge deıin tómendetti.

«KTK» AQ-nyń málimetine qaraǵanda, Qazaqstan aýma­ǵyn­daǵy «Qurmanǵazy» jáne «Isataı» munaı aıdaý stansalary rezervtik kózden elektr ener­gııasyn alyp otyr. Biraq atalǵan nysandarda tótenshe jaǵ­daı qaýpi týyndamaǵan. Tek sor­ǵy qondyrǵylaryn iske qosý tehno­lo­gııalyq sebeppen múmkin bolmaı tur.

Oblystyq ekologııa depar­tamentiniń baspasóz qyzmetinen málim etkendeı, Atyraý munaı óńdeý zaýytynyń sanı­tarlyq qorǵaý aımaǵynyń shekarasynda atmosferalyq aýadan synama alý bastaldy. Ekologterdiń jedel áreket etýine zaýyttaǵy alaý qondyrǵysynda qara tútinniń býdaqtaǵany sebep bolyp otyr.

«Jedel áreket etý maqsatynda departamenttiń zerthanalyq-taldamalyq baqylaý bóliminiń ma­mandary Atyraý munaı óń­deý zaýytynyń sanıtarlyq-qor­ǵaý aımaǵynyń shekarasynda atmosferalyq aýanyń synama­laryn aldy. Synamalardy taldaý qorytyndysy qosymsha habar­lanady», dep málim etti depar­ta­menttiń baspasóz qyzmetinen.

Atyraý oblysy