Almaty oblysynyń Talǵar aýdanyna qarasty Tuzdybastaý aýylynyń turǵyndary aptap ystyqta aýyz sý tapshylyǵyn kórip otyr. Jalpy, megapolıstiń irgesinde jatqan eldi mekende aýyz sý máselesi jyl saıyn qaıtalanatyn dástúrge aınalǵan. Al atqarýshy bılik áli kúnge deıin qurǵaq ýádemen shektelip otyrǵan kórinedi.
Jaqynda áleýmettik jelilerde ákimdik ǵımaratyna basyp kirip, kir jýyp otyrǵan áıel adamnyń beınejazbasy keńinen taralyp, talqylandy. Dál osy oqıǵa atalǵan Tuzdybastaý aýylynda bolǵan edi. Biraq bul eshqandaı kúlkili kórinis emes edi. Aýyz sý túgili turmysqa qajetti sýǵa jarymaǵan jurt amalsyzdan osyndaı qadamǵa barǵanyn aıtady. Al aýyldyń da, aýdannyń da ákimdigi bul máseleden habardar eken.
Tuzdybastaý aýyldyq okrýginiń ákimi Mıras Baımoldanovtyń aıtýynsha, aýyldaǵy aýyz sý tapshylyǵyn túbegeıli sheshý úshin birneshe baǵytta jumys isteý kerek eken. Birinshiden, aýyldy sýmen qamtıtyn jelilerdi tolyqtaı memleket menshigine ótkizý kún tártibinde tur. Bul aýyz sý taratý ortalyqtandyryp qana qoımaı, tólem tarıfindegi alshaqtyqty da retteıdi-mys. Ekinshiden, aýyz sý taratý júıesi eskirgen, ony tolyqtaı aýystyrýǵa aýdan tarapynan qarjy bólinip, sheshilýi tıis. Ári sý jelilerine qyzmet kórsetetin sorǵylardaǵy qurylǵylar da eskirgen, kóbine qysymǵa shydamaı buzylyp jatady eken. Bul da úlken kólemdegi qarjyny qajet etip otyr.
– Tuzdybastaý aýylynda 22 myń adam turady. Aýyz sý máselesi bar. Ony sheshýdiń jolyn qarastyryp jatyrmyz. Bıyl aýdan tarapynan 90 mıllıon teńge shamasynda aqsha bólindi. Bul qarjyǵa sý qubyry men káriz júıesin jańalaýdyń qujatyn jasap, engizdik. Nátıjesi bolady. Qazir aýyl mańynda uzyndyǵy 12 shaqyrymdyq magıstraldy sý qubyrynyń qurylysy júrip jatyr, ol aıaqtalsa, turǵyndardy sýmen qamtýǵa qol jetkizemiz. Jáne eki qudyq ta qazylyp jatyr, syıymdylyǵy 250 tekshe metr bolatyn qudyqtar iske qosylsa, aýyz sýdyń sapasy artyp, tolyqtaı jetkilikti bolar edi, – deıdi aýyl ákimi Mıras Baımoldanov.
Aıtpaqshy, jaqynda Qonaev qalasynda aýdan ákimderiniń basyn qosyp, alqaly jıyn ótkizgen Almaty oblysynyń ákimi Marat Sultanǵazıev tarapynan aýyz sýǵa qatysty aryz-shaǵymnyń jıilep ketkenin aıtty.
– Oblystaǵy aýyldarda sýǵa qatysty týyndap otyrǵan másele kóp. Keıbir sý qubyrynda qysym jetkiliksiz, keıbirinde magıstraldyq sý júıesi rettelmegen. Endi birinde sý súzgisi jolǵa qoıylmaǵan. Osy máselelerdiń bárin aýyl ákimderimen birlesip, tekseristen ótkizip, joba-josparyn jasap jatyrmyz. Sý bar deımiz, biraq is júzinde kósheden tasyp iship, mashaqatyn kórip júrgen aýyl turǵyndary jeterlik, – dedi óńir basshysy.
Iаǵnı oblys ákimi óńir turǵyndarynyń qordalanǵan máselelerin sheshý úshin eń aldymen aýyldardy aýyz sýmen jáne kógildir otynmen qamtamasyz etý boıynsha tekserý, túgendeý jumysyn júrgizýdi basty maqsat etip otyr. Ol úshin tıisti organdar búkil aýdandaǵy eldi meken, aýyldar boıynsha sý, gaz, taǵy da basqa máseleler boıynsha geokarta jasap, málimet berýi kerek.
– Qaı aýylda qaı qubyr istemeıdi, qaı qubyr tolyq jumys istep tur, qaı qubyrdyń qurylysy orta jolda qalyp qoıǵan, osynyń bári kartada kórsetilgeni jón. Eger biz osylaı júıelep almasaq, onda máseleniń sheshimin tabý qıyn. Qazir statıstıkaǵa, derekterge báriniń qoly jetedi. Jasyryp qaıtemiz, joqty joq, bardy bar dep aıtý kerek. Onyń ústine qazir aýyl ákimderin saılap jatyrmyz. Halyq olarǵa senip otyr. Ákimder bar kúshin salyp, úlken umtylyspen, ynta-yqylaspen jumys isteýi qajet, – deıdi Almaty oblysynyń ákimi Marat Sultanǵazıev.
Almaty oblysy