16 shilde kúni О́skemendegi Úlbi ózeninde sýǵa batyp bara jatqan 6 jasar balany Ulttyq ulan jaýyngeri Tilek Qumarbaekov qutqaryp qalǵan bolatyn. Búgin balany qutqarǵan jaýynger marapattaldy, dep habarlaıdy Egemen.kz Ulttyq ulannyń baspasóz qyzmetine silteme jasap.
Ábden shaldyǵyp, jol-jónekeı birshama sý jutyp qoısa da, bar kúshin salyp balany jaǵaǵa alyp shyqqan Tilek esinen tanyp qalǵan. Qýanyshqa oraı sol mańda demalyp júrgen kisiler jedel járdem shaqyryp, Qumarbekov der kezinde qalalyq aýrýhanynyń reanımasııa bólimine jetkizilgen.
Kózsiz erligi úshin 3477 áskerı bóliminiń mamany efreıtor Tilek Qumarbekov Ishki ister mınıstriniń orynasary – Ulttyq ulan Bas qolbasshysy general-maıor Erkin Botaqanovtyń buıryǵymen «Ulttyq ulan úzdigi» tósbelgisimen marapattaldy.
О́skemendegi Antıkrızıstik oqý ortalyǵynda batyrdyń qaısarlyǵyn barsha jeke quram aldynda ulyqtaý ári ózge de áskerı qyzmetshilerge úlgi etý maqsatynda saltanatty shara ótti. Ulyqtaý keshine bólim basshylyǵymen qatar Tilektiń ata-anasy, sondaı-aq «Shyǵys» óńirlik qolbasshylyǵynyń tárbıe jáne áleýmettik-quqyqtyq jumystary jónindegi basqarma basshylyǵy qatysty.
Áskerı bólim basshylyǵy Ulttyq ulan Bas qolbasshysy atynan «Ulttyq ulan qyzmetiniń úzdigi» tósbelgisin jáne «Shyǵys» óńirlik qolbasshylyǵy qolbasshysynyń quqyǵymen «Qoǵamdyq tártipti saqtaǵany úshin» tósbelgisin efreıtor Tilek Qumarbekovke saltanatty túrde tabystady.
Ulynyń batyrlyǵyn barsha jeke quram aldynda ulyqtaý sátine kýá bolǵan ákesi Amantaı Qashqanov ta óz rızashylyǵyn jasyrmady:
- Qadirmendi ofıser myrzalar, áskerı bólimniń basshylyǵy, búgin mine, balamnyń batyl áreketin batyrlyqqa balap, joǵary baǵa berip, qurmettep jatqandaryńyzǵa úlken alǵys aıtqym keledi. Áskerı adam bolǵasyn, qyzmetterińizge adal bolyp, osylaı adam ómirin ajaldan jıi arashalap turýǵa jazsyn, - dedi kópshilik aldynda sóz alǵan Amantaı Qumarbekuly.