Taldyqorǵandaǵy oblystyq perınataldyq ortalyqqa gıpotermııa apparaty men elektrensefalografııa monıtory berildi. Bıyl Samruk-Kazyna Trust qory óz demeýshiligimen gıpotermııanyń apparattyq keshenderimen bes nysandy jabdyqtaýdy josparlasa, Jetisýdaǵy ortalyq sonyń alǵashqysy bolyp otyr.
Mamandardyń aıtýynsha, apparattar Jetisý oblysynda jańa týǵan sábılerdiń ómiri men densaýlyǵyn saqtap qalýǵa úlken kómek bolmaq. Terapııalyq gıpotermııany náreste ómiriniń alǵashqy saǵattarynda qoldanǵan tıimdi. Bul mı jasýshalarynyń jumysyn qalpyna keltirýge erekshe jaǵdaı týǵyzady. Dál temperatýralyq áser qan aǵynyn túzetýge jáne náresteniń bas mıynyń jasýshalary men zaqymdanǵan bólikteriniń qalpyna kelýin baqylaýǵa múmkindik beredi. Amplıtýdalyq elektrensefalografııa monıtory dárigerlerge em barysyn qadaǵalap otyrýǵa jáne tıimdi túzetýge kómektesedi.
Ortalyq jyl saıyn Jetisý óńirindegi aýdan, qalalardan shamamen 6 myńdaı júkti áıeldi qabyldaıdy. Barlyq kúrdeli jaǵdaılarda syrqattar osy mekemege jiberiledi.
«Biz Samruk-Kazyna Trust qory men AYALA qoryna kóp rahmet aıtamyz. Birneshe jyl boıy gıpotermııa apparaty men EEG monıtoryna qol jetkize almadyq. Bizdiń dárigerler bul qurylǵymen qalaı jumys isteý kerektigin biledi. Jyl saıyn biz osyndaı 250-ge jýyq balaǵa qolda bar quraldarmen kútim jasaımyz. Endi bizdiń mamandarǵa zamanaýı medısınalyq apparattar kómektesetin bolady. Bul bizdiń oblysymyzdaǵy sábıler ólim-jitimi kórsetkishterin jáne týylǵannan asfıksııasy bar balalardyń múgedektik qaýpin tómendetetinine senimdimin», deıdi Almaty oblysy Perınataldyq ortalyǵynyń dırektory Qanat Jumashev.
2017 jyly AYALA qory Qazaqstanda alǵash ret avtomatty gıpotermııany synaqtan ótkizdi. Taldyqorǵannyń Perınataldyq ortalyǵynda «Basqarylatyn gıpotermııa» jobasy sheńberinde qor bergen toǵyzynshy apparattyq keshen ornatylyp otyr. 5 jyl ishinde gıpotermııa qondyrǵylary elimizde 210-nan asa balanyń janyn saqtap qalǵan. Aǵymdaǵy jyldyń qazan aıynyń sońyna deıin Samruk-Kazyna Trust demeýshilik qoldaýymen AYALA qaıyrymdylyq qory Oral, О́skemen, Aqtaý jáne Shymkent qalalarynyń perınataldyq ortalyqtarynda gıpotermııanyń apparattyq keshenderin ornatýdy josparlap otyr.
«Elimizdiń bolashaǵy úshin árbir balanyń ómirin saqtaý mańyzdy. Bıyl biz náresteler ólim-jitiminiń deńgeıi men balalar reanımasııasyn aldyńǵy qatarly medısınalyq tehnıkamen qamtamasyz etý máselesi ótkir turǵan 5 aımaq úshin jabdyqtar satyp alýǵa qarjylaı qoldaý kórsettik. Qazirgi zamanǵy apparattar Taldyqorǵan qalasynyń oblystyq perınataldyq ortalyǵynyń dárigerlerine balalar ómirin odan ári saqtap qalýǵa kómektesedi dep úmittenemiz», deıdi Samruk-Kazyna Trust áleýmettik jobalardy damytý qorynyń bas dırektory Alfııa Adıeva.
AYALA QQ prezıdenti Aıdan Súleımenovanyń aıtýynsha, qor jumysynyń basty maqsaty – bala ólimi men múgedektigin azaıtý isinde memleketke járdemdesý. Bul úshin qarajat jınaý men demeýshilerdi tartý arqyly qor balalar reanımasııasyn zamanaýı medısınalyq jabdyqtarmen qamtamasyz etedi jáne qazaqstandyq neonatolog dárigerlerdiń biliktiligin arttyrýǵa kómektesedi. «О́mir syılaıyq», «Basqarylatyn gıpotermııa» jobalary men basqa da bastamalar aıasyndaǵy jumys barysynda qor jalpy somasy 2 mlrd teńgege qazaqstandyq 67 densaýlyq saqtaý mekemesine 1 100-den asa reanımasııalyq medısınalyq jabdyqtardy tapsyrdy. Osy jabdyqtar men dárigerler tegin kýrstarda biliktiligin arttyrý kezinde alǵan bilimderiniń nátıjesinde Qazaqstanda 200 myńnan asa bala aman qaldy.
Atap ótsek, Taldyqorǵandaǵy oblystyq perınataldyq ortalyq 150 tósekke arnalǵan, sonyń 10-y Patologııa jáne shala týǵan nárestelerdi emdeý bólimshesinde ornalasqan. Onda 34 dáriger men 126 orta medısına qyzmetkeri jumys isteıdi.
Jetisý oblysy