Qostanaıda 2020-2025 jyldarǵa arnalǵan ındýstrııalandyrý kartasy aıasynda jalpy quny 179 mlrd teńgeden asatyn bes birdeı iri joba júzege asyrylady. Mashına jasaý salasyna sony serpin beretin aýqymdy jobalardyń nátıjesinde osy jyldyń ózinde myńnan astam jańa jumys oryndary ashylady dep josparlanyp otyr.
Máselen, qalalyq ekonomıka jáne bıýdjet josparlaý bóliminiń basshysy Natalıa Turlybekovanyń aıtýynsha, 2022 jyldyń sońyna taman eki iri zaýyt iske qosylady.
– Qazir eki ǵımarattyń da qurylysy aıaqtalyp qaldy. Olardyń birine «Belorýs» traktorlarynyń «MTZ-Qazaqstan» mashına jasaý zaýyty» JShS ornalasady. Quny 8,3 mlrd teńge bolatyn bul kásiporyn jylyna 10 myń kabına jasap shyǵarady. Zaýyt 150 adamdy jumyspen qamtıdy. Jyl aıaǵyna deıin iske qosylatyn taǵy bir zaýyt – «Tehnopark KZ» JShS. Osy jyldyń ózinde kásiporyn 600-deı shanaq jáne kommýnaldyq tehnıkaǵa arnalǵan qondyrma qurylǵylar shyǵarýdy kózdep otyr. Atalǵan nysan qurylysynyń quny – 2,9 mlrd teńge, 180 jumys orny qurylady, – deıdi Natalıa Turlybekova.
Qalǵan 3 joba 2024 jyly iske qosylady. Sonyń biri – «KamLitKZ» JShS-nyń qurylysy 2019 jyly bastalǵan. Qurylys jumystary men zaýyttyń óndiriske qajet qural-jabdyqtaryn ornatý 5 jyl ishinde aıaqtalýǵa tıis. Jospar boıynsha kásiporyn jylyna 45 myń tonnaǵa deıin sılındr bloktaryn, qozǵaltqysh bastıekterin, karterler men júk kólik beldemesiniń redýktorlaryn quıyp shyǵarady. Zaýyt qurylysyna 78,2 mlrd teńge qarastyrylǵan.
2020 jyly «KamLitKZ» JShS taǵy bir aýqymdy jobany qolǵa alǵan. Quny 82,5 mlrd teńge turatyn asa qymbat joba Qostanaıda «Kamaz» arnaıy tehnıkasyna arnalǵan jylyna 74 myń jetekshi beldeme redýktorlary men qozǵalys aýystyrǵyshtaryn quıýdy kózdeıdi.
Eki jyldan keıin iske qosylatyn «Deutz-Fahr» traktorlaryn qurastyrýdy uıymdastyrý jáne aýyl sharýashylyǵy tehnıkasyna qyzmet kórsetý jónindegi servıstik ortalyq pen logıstıkalyq termınal salý jobasyn «Agromash Holdıng KZ» AQ kompanııasy júzege asyrady. Jobanyń quny – 4,5 mlrd teńge.
– Qostanaıda Indýstrııalandyrý kartasynan tys mashına jasaý salasy men agroónerkásip kesheninde, sondaı-aq jeńil ónerkásip, jańartylatyn energııa kózderi men metallýrgııa salalarynda jalpy quny 327 mlrd teńge bolatyn 19 joba iske asyrylyp jatyr. 2022-2025 jyldar aralyǵynda iske qosylatyn ilkimdi jobalardyń nátıjesinde 3 myńǵa jýyq adam turaqty jumyspen qamtylatyn bolady, – deıdi Natalıa Turlybekova.
Qostanaı oblysy