Ekijyldyq úzilisten keıin «Salamatty Qazaqstan» medısınalyq poıyzy óńirdegi shalǵaı jatqan stansalardy aralap, turǵyndardy dárigerlik tekserýden ótkizýde. Bıyl aq jeleńdiler Pavlodar oblysynda toǵyz eldi mekende aıaldap, aýyl turǵyndaryna kásibı medısınalyq kómek kórsetpek.
«Salamatty Qazaqstan» mamandandyrylǵan medısınalyq poıyzy Pavlodar oblysynyń shalǵaıdaǵy stansalary men olarǵa jaqyn ornalasqan eldi mekenderdiń halqyn medısınalyq tekserýden ótkizýde. Dárigerlik qyzmet aqysyz, pulsyz kórsetiledi. Poıyz 31 shilde kúni Maı razezinde aıaldasa, odan ári Jumysker, Kóktóbe, Qurkóldi betke aldy. Maı aýdanynyń halqyn qarap bitken soń Sharbaqty óńirine baǵytyn buryp, odan ári Aqsýdyń birqatar aýylyn aralaıdy dep josparlanǵan. Sońǵy aıaldama – Shiderti stansasy.
2010 jyldan beri jalǵasyp kele jatqan medısınalyq poıyzdar qaıyrymdylyq jobalary aıasynda uıymdastyrylady. Jalpy, elimiz boıynsha mundaı poıyzdyń eki birdeı baǵyty bar. Onyń biri – «Járdem» poıyzy mamyr aıynyń sońynan beri jumys istep jatsa, «Salamatty Qazaqstan» poıyzy 20 maýsym kúni Almaty oblysynyń Baıserke stansasynan qozǵalyp, búginde bizdiń óńirge jetip otyrǵan jaıy bar.
«Salamatty Qazaqstan» poıyzynyń jetekshisi Aman Qasenovtiń aıtýynsha, jyljymaly medısınalyq quram alǵashqy medısınalyq-sanıtarlyq jáne konsýltatıvtik-dıagnostıkalyq kómek kórsetýge baǵyttalǵan.
– Poıyzda 24 bilikti dáriger bar. Barlyǵy Almaty qalasyndaǵy tanymal klınıkalarda isteıtin bilikti mamandar. Aq jeleńdiler zerthanalyq ádisterdi qoldana otyryp, aýyl turǵyndaryn dárigerlik tekseristen ótkizedi. Qajet bolǵan jaǵdaıda shaǵyn operasııa júrgizip, emhanasy joq shalǵaı aýyldardyń turǵyndaryn jaqyn jerdegi emdeý mekemelerine joldamamen baǵyttaı alamyz. Munda terapevt, pedıatr, kardıolog, nevropatolog, kóz, lor dárigeri, gınekolog, hırýrg, ýrolog, mammolog jáne tis dárigeri baryn atap ótken jón. Bıyl bilikti mamandardyń qatary psıholog jáne dermatovenerologpen tolyqty. Densaýlyq poıyzy pandemııaǵa baılanysty sońǵy eki jylda uıymdastyrylmaı qalǵany málim. Bıyl qaıta jandanǵany aýyl halqyn qýantyp otyr. Qabyldaýymyzǵa kelgen jurtshylyq rızashylyǵyn aıtýda, – deıdi poıyz basshysy.
Keshende qajet bolǵan jaǵdaıda keńeıtilgen jalpy jáne bıohımııalyq taldaýlar, rentgenografııa men flıýrografııa, ishki aǵzalar men tamyrlardyń ÝDZ-zertteýlerin, elektrokardıogramma, gastrofıbroskopııa jáne dıagnostıkalyq zertteýlerdiń basqa da túrlerin júrgizýge múmkindik bar. Bıyl stamotologııalyq qurylǵylar jańartylyp, aýyl turǵyndarynyń tisterin bútindeýde burynǵydan da sapaly qyzmet kórsetý múmkin bolyp otyr.
Buǵan deıin Abaı oblysyn aralap kelgen dárigerlerdiń aqparatyna súıensek, aýyl adamdary gınekolog, júrek jáne tis dárigerleriniń kómegine jıi júginedi. ÝDZ-zertteýge de kezek qalyptasyp qalady eken. Maı aýylynyń turǵyny, zeınetker Maqpýza Beısekenova aıaq-qoly jıi qaqsap, bel-omyrtqa júıesi aýyratynyn aıtady. Munda ol jalpy tájirıbe dárigeriniń kómegine júginip, hırýrgtiń aqyl-keńesin aldy.
Alǵashqy kúni Maı stansasyna toqtaǵan poıyzǵa Aqjar, Qaraterek jáne Maı aýyldyq okrýgteriniń turǵyndary qaralyp, dárigerlik tekserýden ótken. Maı aýdanynyń ishki saıasat jáne tilderdi damytý bóliminiń basshysy Jaırangúl Rahmanbergenovanyń sózinshe, bul úsh aýmaqta 2 myńǵa jýyq adam turady. Jergilikti halyq araǵa eki jyl salyp jalǵasyn tapqan medısınalyq poıyzdyń jumysyna kóńilderi tolatynyn aıtty.
«Salamatty Qazaqstan» kesheniniń dárigerleri 2 qarashaǵa deıin elimiz boıynsha 67 stansany aralap, jalpy sany 60 myń adamdy qamtymaq oılary bar. Pavlodar oblysynan soń poıyz Nur-Sultan qalasyna, odan ári Kókshetaý, Qostanaı, Qaraǵandy, Ulytaý óńirlerine attanbaq.
Jobany «Samruk-Kazyna Trust» áleýmettik jobalardy damytý qory Densaýlyq saqtaý mınıstrliginiń qatysýymen, «Qazaqstan temir joly» UK» AQ janyndaǵy «Áleýmettik jobalar qory» korporatıvtik qorymen birlesip iske asyryp jatqanyn aıtyp óteıik.
Murat QAPANULY,
jýrnalıst
Pavlodar oblysy,
Maı aýdany