Qostanaı oblysy Arqalyq qalasyndaǵy Dala ólkesi tarıhy murajaıynda ataqty qobyzshy, soǵys jáne eńbek ardageri Qazybek Ábenovtiń ózi ustaǵan eki qobyzy saqtalǵan.
Bul qasıetti aspaptyń alǵashqysyn atalǵan mýzeıge 1989 jyly Qazybek qarııanyń ózi tapsyrsa, ekinshisin, 2013 jyly qobyzshynyń uly Borash Qazybekuly tapsyrǵan.
Jalpy, qobyz – kóne aspaptardyń biri. Onyń qaı dáýirden bastaý alǵany belgisiz bolǵanymen, halyq arasyndaǵy ańyz-áńgimelerde «Qobyzdyń atasy – Qorqyt» dep aıtylady. Osy Qorqyt atadan jalǵasqan qobyzshylyq óner Torǵaı elinde keńinen taralǵan. Aryǵa barmaı-aq XIX-XX ǵasyrlarda bul óńirde Tilep Aspantaıuly, Baýbek Esirgepuly, Álmaǵambet (Aryq baqsy), Zákárııa Káribaev, Hamıdolla Shátkenov sekildi esimderi elge málim qobyzshylar ómir súrdi. Osy tulǵalardyń izin basa shyqqan Qazybek Ábenov 1914 jyly Torǵaı jerindegi Jylanshyq ózeniniń boıynda dúnıege kelgen. Bala kúninen qobyz ben dombyrany qatar tartyp, kúıshiligimen, jyrshylyǵymen aty shyǵyp, áıgili Baýbek baqsydan bata alǵan. 1935 jyly Qazaqstannyń halyq aqyny, Memlekettik syılyqtyń laýreaty Nurhan Ahmetbekov uıymdastyrǵan Torǵaıdaǵy kórkemónerpazdar úıirmesine qosylyp, aýyl aralap, óner kórsetedi.
Osydan bastap aıtýly óner ıesiniń esimi elge jaıyldy. Túrli óner baıqaýlaryna qatysyp, júldegerler qatarynan kórindi. Máselen, 1934 jyly Almatyda ótken halyq shyǵarmashylyǵynyń alǵashqy baıqaýynda belgili qobyzshy Jappas Qalambaevtan keıingi ekinshi oryndy ıelense, 1937 jyly kórnekti kompozıtor, óner zertteýshisi Ahmet Jubanov uıymdastyrǵan halyq aspaptar oryndaýshylarynyń respýblıkalyq festıvalinde ustazy Baýbek baqsynyń «Qońyrjaı» kúıin oryndap, bas júldeni jeńip aldy. 1949 jyly Almatyda ótken qyl qobyzshylardyń baıqaýynda da top jardy. Sondaı-aq 1951 jyly Qazaqstannyń Máskeýde ótken onkúndigine qatysyp, el mereıin asyrsa, 1952 jyly Máskeýdegi Búkilodaqtyq kórkemónerpazdar baıqaýynda jeke oryndaýshylar arasynda laýreat atandy. Osy jetistigi úshin Qazaq KSR Joǵarǵy Keńesi Prezıdıýmynyń Qurmet gramotasymen marapattaldy. Belgili ólketanýshy Shóptibaı Baıdildın aǵamyz bir sózinde Qazybek qobyzshyny akademık Ahmet Jubanov ózi qurǵan Qazaq ulttyq halyq orkestrine bas qobyzda oınaýǵa shaqyrǵandyǵyn aıtady. Alaıda ol kisi orkestr quramynda az ǵana merzim óner kórsetip, otbasylyq jaǵdaıyna baılanysty týǵan jerine qaıtyp oralady. Sodan keıin 20 jyldan asa ýaqyt Amangeldi aýdandyq Mádenıet úıiniń dırektory bolyp, el ishindegi mádenı jumystarǵa belsene aralasyp, ulttyq ónerimizdiń damýyna aıtarlyqtaı úles qosty. Qabiletti jastardy ónerge baýlyp, shákirt tárbıeledi. 1971 jyly oǵan Qazaq KSR-niń eńbek sińirgen mádenıet qaıratkeri ataǵy berildi.
Qazybek atamyzdyń qobyzshylyǵyn ǵana emes, sazgerligin de ónersúıer qaýym moıyndaǵan. Onyń qobyzǵa arnap «Sybyzǵy», Qoshtasý», «Torǵaı tolǵaýy» atty jazǵan kúılerin jurtshylyq jaqsy biledi. Sonymen qatar daryndy ónerpazdyń dombyrashylyǵyn da el adamdary aýzynan tastamaıdy. Ol «Kóruǵyly», «Kóruǵyly men Bezergen», «Qobylandy», «Alpamys» atty kóne jyrlar men Nurhan Ahmetbekovtiń «Ury Qarǵa», Esim seri» poemalaryn tańnan-tańǵa uryp aıtyp qana qoımaı, dombyraǵa arnap «Jorǵa», «Jaılaý», «Sahara» atty kúılerin shyǵarǵan. Sondaı-aq talantty qobyzshynyń balalary da áke jolyn jalǵap, óner jolyn qýǵan. Ásirese Sapar Qazybekuly sanaly ǵumyryn qyl qobyzǵa arnap, áke murasyn nasıhattady.
Búginde Qostanaı oblysy Amangeldi aýdanyndaǵy Mádenıet úıi Qazybek Ábenovtiń esimimen atalady.