Aqmola oblysy ákimdiginiń qoldaýymen elordadaǵy Ulttyq mýzeı janynan qurylǵan Rýhanı murany ǵylymı-zertteý ınstıtýty «Qazaqtyń dástúrli mádenıeti» bóliminiń qyzmetkerleri oblys aýmaǵyna ǵylymı-zertteý ekspedısııasyn júrgizip, nátıjesinde saq dáýirine tán qurbandyq tasyn tapty.
Bul tasty Jarqaıyń aýdanynyń turǵyny Leonıd Dolının degen azamat 2000 jyly Shoıyndykól aýyly aýmaǵynda ornalasqan eski qorymnan taýyp alǵan eken. Mamandar dóńgelek pishindi, bir jaq shetinde qaıyrylǵan qoshqar múıizi qashalyp órnektelgen bul jádigerdi b.z.d. III-II ǵasyrǵa tıesili deıdi. Iаǵnı sol kezdegi halyqtyń tanym-túsiniginde qoshqar beınesi totemdik sımvolıka- lyq mańyzǵa ıe bolǵany anyq.
Ejelgi dástúrlerge tán qurbandyq shalý, táńirge jalbaryný sııaqty túrli minájattardy oryndaýdy beıneleıtin mundaı qurbandyq tastary sırek kezdesetin ári qundy jádiger ekeni belgili.
Zertteýshi K.F.Smırnovtyń paıymdaýynsha, mundaı qurbandyq tastary molalar ishinen tabylýy dinı ǵuryptyq jaǵdaılarǵa baılanysty deıdi. Búgingi tańda elimiz boıynsha mundaı qurbandyq tastarynyń 40-qa jýyq túri belgili bolsa, onyń 10-nan astamy Aqmola, Soltústik Qazaqstan, Qostanaı, Jambyl, Mańǵystaý, Túrkistan oblystarynyń mýzeıinde saqtaýly tur.
Osy oraıda, joǵaryda aıtqanymyzdaı, Aqmola oblysy aýmaǵynan mádenı-rýhanı muralardy jınap, zertteýdi maqsat etken ekspedısııa músheleri Jarqaıyń, Sandyqtaý, Atbasar, Ereımentaý, Jaqsy jáne Esil aýdandaryn aralap, el ishindegi qundylyqtarmen tanysýmen qatar, ólke tarıhynan habary bar kónekóz aqsaqaldarymen de júzdesýde.