Jaz aılarynda kene shaǵý qaýpi kúsheıetin aımaqtyń biri – Shyǵys Qazaqstan oblysy. Qansha saqtanǵanmen, bul jándikke tap bolatyn turǵyndardyń sany azaımaı tur. Ásirese balalardyń qaýipsizdigi alańdatady. Bıyl kóktem shyqqaly beri óńirde myńǵa jýyq balany kene shaǵyp alǵan.
Shyǵys Qazaqstan oblysy Sanıtarııalyq-epıdemıologııalyq baqylaý departamentiniń baspasóz qyzmetiniń málimeti boıynsha sáýir aıynan beri endemııalyq aýmaqtarda 3 346 adamdy kene shaqty. Onyń ishinde 14 jasqa deıingi balalardyń sany – 997. Bul keneden zardap shekkender úlesiniń 30 paıyzyna jýyqtaıdy.
«Kene ensefalıtine shaldyqqan 8 adam tirkelgen. Bul naýqastardyń eshqaısysy kene shaqqannan keıin medısınalyq kómekke júginbegen. Dárigerlerge ýaqtyly, ıaǵnı úsh kúnnen keshiktirmeı qaralǵan adamdardyń arasynda kene ınfeksııasyn juqtyrǵandar bolǵan joq. Kene ensefalıtin emdeý tek stasıonarlyq jaǵdaıda júrgiziledi. Infeksııa juqtyrǵan óńirdiń 7 turǵyny juqpaly aýrýlar aýrýhanalary men bólimshelerine jatqyzylǵan. Pasıentterge arnaıy em-dom taǵaıyndaldy», delingen atalǵan departament bergen aqparatta.
Bul rette mamandar qaýipti jándiktiń belsendi bolatyn maýsymy balalardyń jazǵy demalys ýaqytyna sáıkes keletinin, sondyqtan kishkentaılardyń qaýipsizdigine barynsha saq qaraý kerek ekenin eskerterdi. Tabıǵatta, saıabaqta, jazǵy saıajaıda serýendeý kezinde balany kene shaǵýdan qorǵaý úshin shashy men aıaq-qolyn ashyq qaldyrmaı, meılinshe jabyq kıindirý usynylady. Iаǵnı balanyń basyna sharf baılaý nemese baskıim kıgizgen, sondaı-aq fýtbolka emes uzyn jeıde, shortynyń ornyna uzyn shalbar, ashyq sandaldardy jabyq aıaqkıimmen aýystyrǵan jón. Buǵan qosa kıimniń ashyq tústi bolýyna mán berý kerek, sonda kene kózge jaqsy kórinedi.
Qaýip aıaq astynan, eger kene shaǵyp alsa, ony alyp tastamaı, dereý jaqyn mańdaǵy jaraqat ortalyǵyna nemese emhanaǵa habarlasý kerek. Iаǵnı birden medısınalyq kómekke júgingen abzal.