ASTANA. 6 mamyr. Qazaqstan Aýyl sharýashylyǵy vıse-mınıstri Gúlmıra Isaeva keshe «QazAgroInnovasııa» AQ ujymyna jańa basqarma tóraǵasyn - Satybaldın Ázimhan Ábilqaıyrulyn tanystyrdy. Bul týraly «QazAqparat» agenttigi habarlady.
Á.Satybaldın 1959 jyly 13 qazanda Jambyl oblysy Talas aýdanynyń Aqkól aýylynda týǵan. Qazaq Aýyl sharýashylyǵy ınstıtýtyn bitirgen. Mamandyǵy - ekonomıst-uıymdastyrýshy.
1983 jyly eńbek jolyn Talas aýdany agroónerkásiptik birlestiginiń ekonomısi, Maıtóbe keńsharynyń bas ekonomısi bolýdan bastaǵan. Qazaq qoı sharýashylyǵy tehnologııasy ǵylymı-zertteý ınstıtýtynda kishi jáne aǵa ǵylymı qyzmetker, Qazaq agroónerkásiptik kesheni ekonomıkasy jáne uıymdastyrý ǵylymı-zertteý ınstıtýtynda ǵylymı qyzmetker, bólim meńgerýshisi, ınstıtýt dırektorynyń orynbasary, Qazaq Aýyl sharýashylyq ǵylymdary akademııasynyń bas ǵylymı hatshysy, Shymkent ǵylymı-óndiristik birlestiginiń bas dırektory, Prezıdenti Ákimshiliginiń ekonomıkalyq saıasat bólimi bastyǵynyń birinshi orynbasary, Ulttyq akademııalyq agrarlyq zertteýler ortalyǵynyń bas dırektory, Agrarlyq ǵylymdar boıynsha Ǵylym akademııasynyń vıse-prezıdenti, Ǵylym mınıstrligi Ǵylym akademııasynyń vıse-prezıdenti, TQHK túrik tildi elderdiń ıntegrasııalyq baılanysyn zertteý ınstıtýtynyń dırektory qyzmetterin atqarǵan.
2007 jyly mamyrda Qazaqstan Respýblıkasynyń Memlekettik qyzmet isteri jónindegi agenttiktiń Jambyl oblysyndaǵy aýmaqtyq basqarma bastyǵy -Tártiptik keńestiń tóraǵasy bolyp taǵaıyndaldy.
«Qurmet» ordenimen marapattalǵan.
Buǵan deıin Á.Satybaldın QAI AQ basqarma tóraǵasy mindetin ýaqytsha atqarýshysynyń orynbasary bolǵan.
Sáken Maılybaı.
Derekkóz: QazAqparat.