Beıjińniń Ortalyq «Chaoıan» saıabaǵyndaǵy «Szıntaı» mýzeıinde Abaı kúnin merekeleý aıasynda Abaı oqýlary ótti, dep habarlaıdy Egemen.kz.
Is-shara áıgili qytaı músinshisi Iýan Sıkýn jasaǵan jáne 2014 jyly naýryzda Qytaı astanasynyń ortalyǵyndaǵy «Chaoıan» saıabaǵynda ornatylǵan Abaı eskertkishine gúl qoıý rásiminen bastaldy.
Abaı oqýlaryn QHR mınıstrlikteri men vedomstvolarynyń, ShYU Hatshylyǵynyń ókilderi, Qytaıdaǵy TMD elderi dıplomatııalyq ókildikteriniń basshylary, qazaqstandyq jáne qytaılyq stýdentter tyńdady.
Shyǵarmashylyq is-shara qonaqtary qazaq jáne qytaı tilderindegi Abaı shyǵarmalarynyń jınaqtarymen tanysty.
Qazaqstannyń Qytaıdaǵy Elshisi Shahrat Nuryshev óz sózinde Abaıdyń shyǵarmashylyǵy, onyń qazaq fılosofııasy men ádebı tildi qalyptastyrýdaǵy róli týraly aıtyp berdi.
Sh.Nuryshev 2015 jyldan bastap Beıjiń, Shanhaı, Dalıan jáne Sıan joǵary oqý oryndarynda «Qazaqstan ortalyqtary» men qazaq tili kafedralary ashylǵanyn, onda qazaq ádebıeti, mádenıeti, tarıhy jáne Abaı shyǵarmalary zertteletinin habarlady.
«Jyl saıynǵy «Abaı oqýlary» ıgi dástúrge aınaldy. Bul is-shara ózara qurmetke negizdelgen eki eldiń arasyndaǵy rýhanı qarym-qatynastardyń joǵary deńgeıin kórsetedi», dep atap ótti Qazaqstannyń QHR-daǵy Elshisi.