Búgin zııaly qaýym ókilderi elordadaǵy Abaı eskertkishine gúl shoqtaryn qoıdy, dep habarlaıdy Egemen.kz qala ákimdiginiń resmı saıtyna silteme jasap.
Saltanatty jıynǵa memleket jáne qoǵam qaıratkerleri, zııaly qaýym, qalalyq ardagerler keńesiniń ókilderi, ǵalymdar, maslıhat depýtattary, sondaı-aq Nur-Sultan qalasy ákiminiń orynbasary Eset Baıken qatysty.
«Abaıdyń sózi – myńjyldyqtardyń enshisi. Sondyqtan «Jańa Qazaqstandy» órkendetý úshin Abaıdyń danalyq ǵıbrattaryn isimizde, qareketimizde, oıymyzda qoldanýymyz kerek. Bastysy, Abaıdyń ǵıbrattaryn, kemeńgerlik keńesterin ómirimizde laıyqty paıdalanýymyz qajet. Sol kezde ǵana biz rýhanı jetilemiz jáne «Jańa Qazaqstandy» damytamyz. Abaı – adamzattyń sózin sóılegen adam. Ol adamzat oıshyldarynyń qatarynda turǵan adam. Ol – Pýshkın men Lermontovty sóıletken adam. Abaıdyń joly – «Jańa Qazaqstannyń» jarqyn joly dep esepteýimiz kerek», dedi ǵalym Serik Negımov.
Jınalǵan qaýym ult perzentine taǵzym jasap, gúl shoqtaryn qoıdy.
«Jyl saıyn 10 tamyz kúni dástúr boıynsha Abaıdyń eskertkishine gúl shoǵyn qoıý rásimi bolady. Keıin elordada aýqymdy is-sharalar bastalady. Máselen, mektepter men JOO-larda tanymdyq is-sharalar ótkiziledi. Sonymen qatar, bıyldan bastap iri-iri saýda ortalyqtarynda Abaıdyń óleńderi men qara sózderiniń aýdıo nusqasy jarııalanyp turady. Bul kúndelikti 15-20 ret shyǵyp turady», dedi Nur-Sultan qalasynyń ákimdigi Tilderdi damytý jáne arhıv isi basqarmasynyń basshysy Sáken Esirkep.
Eske sala ketsek, 2020 jyly Úkimet qaýlysymen 10 tamyz – Abaı kúni dep belgilengen.