Ertis aýdanyndaǵy Amangeldi aýyly oıda joqta syrtqy álemmen baılanyssyz qaldy. Tolassyz jaýǵan nóser jańbyr aýyldy aýdan ortalyǵymen baılanystyratyn avtojolǵa nuqsan keltirgen. Halyq eldi mekennen shyǵa almaı qınaldy. Jýyqta bul jerden ótetin respýblıkalyq joldy jóndeý jumystaryna baılanysty aınalma jol salynǵan edi. Jańbyr sýy atalǵan jerdi shaıyp ketken.
Turǵyndardyń janaıqaıyn eń áýeli áleýmettik jelide taraǵan beıneúndeýden baıqadyq. Onda Amangeldi aýylynyń halqy oblystyń jolaýshylar kóligi jáne avtokólik joldary basqarmasynan kómek suraǵan. Eldi meken Qazaqstan men Reseıdiń dál shekara túbinde ornalasqan. Aýyldan «úlken trassaǵa» shyǵatyn jol bireý ǵana, Ol «Lenın – Ertis – Rýsskaıa polıana» respýblıkalyq jolyna baryp túıisedi. Al ol magıstraldyń 4 shaqyrymǵa jýyq bóligi Reseıdiń Omby oblysyna kirip tur. 1 tamyzdan bastap Reseı jaǵy joldyń atalǵan ýchaskesin jaýyp, avtokólikterdiń kez kelgen túrine júrýge tyıym salypty. Al «Lenın – Ertis – Rýsskaıa polıanaǵa» qyzmet kórsetý quzyry «QazAvtoJol» AQ-ǵa júktelgen.
Ertis aýdanynyń ákimdigi jýyqta Lenın aýyly arqyly RF ýchaskesine deıin ótetin uzyndyǵy 17 shaqyrym joldyń Amangeldi aýylyna kireberisin rekonstrýksııalaý, ári topyraq jamylǵysyn asfalt-betonǵa aýystyrý jobasyn ázirlegen eken. Odan soń aınalma jol daıyndalǵan. Alaıda merdigerler tósegen aınalma jol jaýynǵa shydas bermeı, mı batpaqqa aınalyp ketken. Saldarynan aýyl halqy irgede turǵan Lenın eldi mekenine jete almaı azapqa túsip otyr.
Aýyl turǵyny Qadısha Rahmetovanyń aıtýynsha, Amangeldide 300-ge jýyq adam turady. Kóbi – zeınetker men bala.
«Bul – bizdi syrtqy álemmen baılanystyratyn jalǵyz jol. Aýylǵa avtobýs kire almaı qaldy. Jeńil kólikter aınalma jolda batyp jatyr. Jol mashaqaty bıyl ǵana emes, 8 jyldan beri jalǵasyp kele jatyr. Jańbyr jaýsa, kelesi kúni joldyń degdigenin kútip otyramyz. Kórshi aýyldan azyq-túlik ákelýge, aýdan ortalyǵyndaǵy aýrýhanaǵa kóriný úshin osy jolmen júremiz. Qudaı betin aýlaq qylsyn, aýylda adam qatty aýyra qalsa, aýrýhanaǵa jete almaıtyny anyq. Bizdiń eldi mekende, tipti naýbaıhanada joq», degen shaǵymyn jetkizdi turǵyn.
Amangeldi aýyldyq okrýginiń ákimi Almagúl Sharmanova máseleni jaqsy biledi. Apta basynda jańbyr bir táýlikten asa jaýǵandyqtan aýyldastaryn kelesi kúni 18 shaqyrym jerde turǵan Lenın aýylyna uzaq júrip áreń jetkizgenin aıtady. Aýylda azyq-túlik dúkeni joq bolýyna baılanysty halyq aýdan ortalyǵyna baryp saýda jasaıdy. Ákimniń ózi bul aýylda 38 jyl boıy turatynyn, respýblıkalyq joldyń shyrǵalańy kópten beri jalǵasyp otyrǵanyn qynjyla aıtty.
Oblystyń jolaýshylar kóligi jáne avtokólik joldary basqarmasy óz kezeginde búginde atalǵan aınalma joldyń betki qabaty ınertti materıaldarmen nyǵaıtylyp jatqanyn habarlady. 10 tamyz kúni basqarma men «QazAvtoJol» jáne «Qazaqavtodor» mekemeleriniń ókilderi atalǵan ýchaskege baryp, másele týyndap turǵan tustyń barlyǵyn qaǵazǵa túrtip alypty. Aıtýlarynsha, aldaǵy ýaqytta bul jerde arnaıy tehnıkalar sany kóbeıtiledi.
Deı turǵanmen, amangeldilik jurt máseleniń birden sheshile salatynyna kúmánmen qarap otyr. Qazir kún ysyp, jańbyr basylǵanymen kúzde aınalma jol taǵy mı batpaqqa aınala ma degen qaýip bar. Qońyz kúzde bul jolmen qysqa qajet mal azyǵy men otyn-sýyn tasymaldaıtyn aǵaıyn jol azabyn taǵy tartary anyq.
Pavlodar oblysy,
Ertis aýdany