Kúni keshe ǵana 3-18 qyrkúıek aralyǵynda Shotlandııanyń Glazgo qalasyndaǵy «Emıreıts arenada» ótetin Devıs kýbogynyń toptyq týrnırinde Qazaqstannyń tennısshileri qandaı quramda óner kórsetetini belgili boldy. Komanda kapıtany Iýrıı Shýkın Aleksandr Býblık, Mıhaıl Kýkýshkın, Dmıtrıı Popko, Andreı Golýbev jáne Aleksandr Nedovesov syndy sańlaqtarǵa senim artyp otyr. Sondaı-aq sol tizimge Tımofeı Skatov ta qosalqy oıynshy retinde endi.
Qazaqstan quramasy sapyndaǵy eń myqty oıynshylar Aleksandr Býblık pen Mıhaıl Kýkýshkın ekeni sózsiz. 25 jastaǵy Býblık bul kúnderi álemdik reıtıngte 42 oryndy ıelenýde. Kýkýshkın qazirgi kezde nebári 213 oryndy qanaǵat tutyp otyrǵanymen, kezinde onyń TOP-40 tennısshiniń qatarynda bolǵanyn jankúıerler umyta qoıǵan joq. Sol sebepti de 34 jastaǵy ardagerge artylar senim zor. Býblıkpen túıdeı qurdas Dmıtrıı Popko da sońǵy ýaqytta táýir oınap júr. Búgingi tańda jerlesimiz 219 oryndy enshilegen. Al Andreı Golýbev pen Aleksandr Nedovesov juptyq saıysta kúsh synasady. Osy oraıda byltyr Rolan Garros týrnırinde Býblıkpen jup qurǵan Golýbev fınalǵa deıin jetkenin aıta ketsek esh aıyby joq dep oılaımyz.
D tobyna túsken jerlesterimiz AQSh, Ulybrıtanııa jáne Nıderland quramalaryna qarsy oınaıdy. Amerıkalyqtar Devıs kýbogynda 32 márte dara shyǵyp, 28 ret fınalda óner kórsetti. Dáp qazirgi kezde atalǵan memlekettiń 13 óreni TOP-100 oıynshynyń qatarynda. Olar – Teılor Frıts (13), Frensıs Tıafo (24), Reıllı Opelka (25), Tommı Pol (31), Maksım Kressı (32), Djenson Brýksbı (43), Djon Isner (50), Sebastıan Korda (52), Markos Djıron (54), Brendon Nakashıma (66), Makkenzı Makdonald (72), Djeffrı Volf (82) jáne Denıs Kýdla (95). Osy sańlaqtardy qandaı dúbirli dúrmekke qossańyzdar da, senim údesine shyǵý úshin esh aıanyp qalmasy anyq.
Ulybrıtanııa atalǵan týrnırde 10 márte top jaryp, segiz ret fınaldyq saıysta ese jiberdi. Bul komandanyń úzdigi – Kemeron Norrı. 27 jastaǵy Kemeron OAR-da týǵanymen, biraz jyl Jańa Zelandııanyń namysyn qorǵady. Keıinnen Tumandy Albıon eline qonys aýdardy. Bıyl Ýımbldonnyń jartylaı fınalyna deıin jetken Norrı ATR tiziminde 10-oryndy oljalaýda. Álemdik reıtıngte 30 satyǵa jaıǵasqan 32 jastaǵy Denıel Evanstyń da ekpini kúshti. Desek te, brıtandyqtardyń basty juldyzy – Endı Marreı ekeni daýsyz. Kezinde Ýımbldon men US open týrnırlerin utyp, Rolan Garros pen Aýstralııanyń ashyq birinshiliginiń fınalynda oınaǵan ol sol shaqta álemniń birinshi raketkasy atanǵan edi. Keıinnen jaraqatyna baılanysty Marreı biraz ýaqyt úlken sporttan qol úzip qaldy. 2021 jyly kortqa qaıta oralǵan 35 jastaǵy tennısshi birte-birte babyna enip keledi. Bul kúnderi Endı úzdikter tiziminde 47-oryndy ıemdenýde. Sondaı-aq myqtylar sanatynda Djek Dreıper syndy sańlaq bar. Ol ATR reıtınginde 55-orynǵa turaqtady.
Nıderland quramasy ondaı orasan zor tabysymen maqtana almaıdy. Olardyń eń úzdik nátıjesi – 2001 jyly Devıs kýbogynyń jartylaı fınalyna shyǵýy. Qazirgi kezdegi Qyzǵaldaqtar eli ókilderi arasynda Botık Van de Zandshýlp pen Tallon Grıkspýrdy bóle-jara atap ótýge bolady. Ekeýi de 26 jasta. Sonymen qatar buǵan deıin kóleńkede qalyp júrgen Tım Van Rııthoven de sońǵy ýaqytta óz oıyn órnegin taba bastady. Ol ATR reıtınginde 120-orynǵa taban tirep tur.
– Biz kil myqty jınalǵan óte kúshti topqa tústik. Ulybrıtanııalyqtar óz jerinde oınaıdy. Barsha kórermenniń solardy qoldaıtyny anyq. AQSh quramasynyń ataǵy alysqa jaıylǵan. Amerıkalyqtar Devıs kýbogynyń basty favorıtteri. Al Nıderlandpen 2019 jáne 2020 jyldary oınaǵanbyz. Ol kezdegi atalǵan eldiń órenderi jas bolatyn. Qazir olar ábden ysyldy. Sondyqtan da Qyzǵaldaqtar eli ókilderimen sanaspaýǵa bolmaıdy. Biraq biz Glazgo kortynda esh aıanbaı aıqasyp, shırek fınalǵa shyǵý úshin barynsha kúsh salamyz, – deıdi Qazaqstan quramasynyń kapıtany Iýrıı Shýkın.
О́zge toptarda myna komandalar ózara kúsh synasady: A toby – Horvatııa, Italııa, Argentına jáne Shvesııa. Bul kezdesýler Italııanyń Bolonıa qalasynda ótedi. V toby – Ispanııa, Kanada, Serbııa jáne Ońtústik Koreıa. Olar Pırneı túbegindegi eń ásem shaharlardyń biri – Valensııada sheberlik baıqasady. S toby – Fransııa, Germanııa, Belgııa jáne Aýstralııa. Bul básekeler nemisterdiń Gambýrg qalasynda uıymdastyrylady. Ár topta alǵashqy eki oryndy ıelengen komandalar Devıs kýbogynyń shırek fınalyna joldama alady. Bul mejedegi básekeler ústimizdegi jyldyń qarasha aıynda Ispanııanyń Malaga qalasynda ótedi.