Kókpardan QR ulttyq quramasynyń músheleri osy jyldaǵy ekinshi oqý-jattyǵý jıynyn ótkizdi, dep habarlaıdy Egemen.kz.
Tamyz aıynda Almaty oblysy, Eńbekshiqazaq aýdany, Olımpıadalyq daıarlaý ortalyǵynda jalpy dene daıyndyǵy boıynsha jattyǵý jasap, sportshylar fızıkalyq turǵydan shynyqqan bolatyn.
Kezekti oqý-jattyǵý jıyny 7-20 tamyz aralyǵynda Jambyl oblysy, Taraz qalasyndaǵy «Atletık» sport bazasynda ótti. Bul oqý-jattyǵý jıynynda sportshylar arnaıy daıyndyqtan ótip, attarmen birge jattyǵý jasady.
Kókpardan bas jattyqtyrýshy Qýanyshbek Quramaev ulttyq quramadaǵy 24 sportshyny jan-jaqty daıyndyqtan ótkizýde. Quramada elimizdiń barlyq óńirinen myqty sportshylar qamtylǵan.
Ulttyq quramanyń sapynda kókpardan QR eńbek sińirgen sport sheberi Abylaıhan Nyshanbekov, kókpardan Azııa chempıony - Qurmanbek Turǵanbek syndy beldi shabandozdar bar. Sondaı-aq, elimizdiń namysyn Nurqasqa, Búrkit, Zańǵar, Naıman, Kámpıt, Qarshyǵa syndy úzdik attar qorǵaıdy.
Atalǵan oqý-jattyǵý jıyndary IV Dúnıejúzilik kóshpendiler oıyndaryna baǵyttalǵan. Kóshpendilerdiń dástúri men jaýyngerlik rýhyn jańǵyrtqan IV Dúnıejúzilik kóshpendiler oıyndary Túrkııanyń Iznık qalasynda 29 qyrkúıek pen 2 qazan aralyǵynda ótedi.
Qazirgi tańda «Ulttyq jáne at sporty túrleri ortalyǵynan» kókpar men qazaq kúresinen ulttyq quramalar daıyndyqtaryn pysyqtap jatyr.
Sonymen qatar, Ortalyqqa qarasty asyq atý, aýdaryspaq, jamby atý, toǵyzqumalaq, saıatshylyq, teńge ilý ulttyq sport túrleri de qatysady dep kútilýde.